(សេអ៊ូល)៖ នៅអំឡុងពាក់កណ្ដាល​ទសវត្សរ៍ឆ្នាំ១៩៨០ អតីតប្រធានាធិបតីកូរ៉េខាងត្បូង លោក Chun Doo-hwan បានបង្ហាញការសោកស្ដាយជាខ្លាំង ដែលកូរ៉េខាងត្បូងមិនមានអាវុធនុយក្លេអ៊ែរ ពោលគឺសម្រាប់លោកបើសិនជាទីក្រុងសេអ៊ូល​ មានអាវុធ​នុយក្លេអ៊ែរតែបីគ្រាប់ប៉ុណ្ណោះ នោះកូរ៉េខាងជើង​នឹងដើរចូលកិច្ចប្រជុំ​អន្តរកូរ៉េដោយខ្លួនឯង​ជាមិនខាន។ នេះបើតាមឯកសារការទូត ដកស្រង់ដោយទីភ្នាក់ងារសារព័ត៌មាន យ៉ុនហាប់ នៅរសៀលថ្ងៃអង្គារ ទី១១ ខែមេសា ឆ្នាំ២០១៧។

ការលើកឡើង​បែបនេះរបស់លោក Chun ធ្វើឡើងនៅ​ក្នុងជំនួបជាមួយ​បេសកជន​ពិសេសអាមេរិក លោក Edward Rowny ក្នុងទីក្រុង​សេអ៊ូលនៅថ្ងៃទី១៥ ខែតុលា ឆ្នាំ១៩៨៦។ ក៏ប៉ុន្តែទន្ទឹមគ្នា​នឹងការ​ចេញផ្សាយ​ឯកសារនេះដែរ វាបានបង្ក​ជាមន្ទិល​សង្ស័យថា តើបច្ចុប្បន្ន​ទីក្រុងសេអ៊ូល​​ចង់មានអាវុធ​នុយក្លេអ៊ែរ​ដូចគេឯង ឬក៏យ៉ាងណា ខណៈកម្មវិធី​អាវុធនុយក្លេអ៊ែរ និងមីស៊ីលកូរ៉េខាងជើង កាន់តែរីកចំរើនទៅមុខ។ លោក Chun ថ្លែងនៅក្នុង ឱកាសនោះដូច្នេះថា «បើទោះជាកិច្ច​ពិភាក្សារវាង​សហរដ្ឋអាមេរិក និងសហភាព​សូវៀត ដំណើរការ​ទៅប្រកបដោយផ្លែផ្កា ហើយទីក្រុង​វ៉ាស៊ីនតោន​ធានាការពារ​កូរ៉េខាងត្បូង​ក៏ដោយ តែអ្វីដែល​ប្រសើរជាងនេះ​នោះគឺថា បើយើងមាន​អាវុធនុយក្លែអ៊ែរ​តែ០៣គ្រាប់ កូរ៉េខាងជើង ប្រាកដជា​មិនអាចបដិសេធឡើយ​ចំពោះកិច្ចចរចាអន្តរកូរ៉េ»

គួរបញ្ជាក់បន្ថែមថា លោក Chun Doo-hwan ដែលបានឡើង​កាន់អំណាច​ដោយសារការ​ធ្វើរដ្ឋប្រហារ​យោធានៅ​ថ្ងៃទី១២ ខែធ្នូ ឆ្នាំ១៩៧៩ ធ្លាប់បាន សន្យាជា​មួយសហរដ្ឋអាមេរិក​ថា​ នឹងមិនអភិវឌ្ឍន៍អាវុធនុយក្លេអ៊ែរ​ឡើយ នៅអំឡុងពេល​ជួបអតីតប្រធានាធិបតី​អាមេរិក លោក រ៉ូណាល់ រីហ្គែន ក្នុងទីក្រុងសេអ៊ូល កាលពីខែវិច្ឆិកា ឆ្នាំ១៩៨៣ ដើម្បីទទួល​បានការទទួល​ស្គាល់ភាពស្របច្បាប់​នៃការកាន់អំណាច​របស់លោក៕