(វ៉ាស៊ីនតោន)៖ ខ្មាន់កាំភ្លើងម្នាក់បានបើកការបាញ់រះ នៅឯសាលាបឋមសិក្សាមួយកន្លែងស្ថិតនៅក្នុងទីក្រុង San Bernardino នៃរដ្ឋ California នៅថ្ងៃចន្ទ (ម៉ោងនៅវ៉ាស៊ីនតោន) ដោយបណ្ដាលឱ្យគ្រូបង្រៀនម្នាក់ និងក្មេងប្រុសអាយុ០៨ឆ្នាំម្នាក់ស្លាប់បាត់បង់ជីវិត ខណៈក្មេងពីរនាក់ទៀតបានរងរបួសធ្ងន់ មុនរូបគេបាញ់សម្លាប់ខ្លួនឯង។ នេះបើតាមប៉ូលិសនៅក្នុងតំបន់ដកស្រង់ដោយសារព័ត៌មាន Channel News Asia នៅព្រឹកថ្ងៃ អង្គារ ទី១១ ខែមេសា ឆ្នាំ២០១៧។
ប្រភពដដែលបានឱ្យដឹងទៀតថា បុរសជាខ្មាន់កាំភ្លើងឈ្មោះថា Cedric Anderson មានអាយុ៥៣ឆ្នាំ និងជាអ្នករស់នៅក្នុងតំបន់ ហើយក៏ជាអតីតប្ដីរបស់អ្នកគ្រូម្នាក់ឈ្មោះ Karen Elaine Smith អាយុ៥៣ឆ្នាំ ដែលត្រូវបានបាញ់សម្លាប់ផងដែរ។ ទន្ទឹមគ្នានោះដែរប៉ូលិសមិនទាន់បានបញ្ជាក់ នៅឡើយទេពីហេតុផលនៃការបាញ់ប្រហារនេះ ស្របពេលពួកគេកំពុងរឹតបន្តឹងសន្តិសុខ នៅឯសាលាបឋមសិក្សា North Park Elementary School៕
