(អេហ្ស៊ីប)៖ ប្រធានាធិបតីអេហ្ស៊ីបលោក Abdel Fattah al-Sisi បានប្រកាសនៅក្នុងសេចក្តីថ្លែងការណ៍ តាមកញ្ចប់ទូរទស្សន៍ ដាក់ប្រទេសរបស់លោកឲ្យស្ថិតក្នុងគ្រាអាសន្នរយៈពេលបីខែ បន្ទាប់ពីមានការ វាយប្រហារដ៏ប្រល័យចំនួនពីរកន្លែងផ្ទួនៗគ្នា ទៅលើវិហារ​សា​សនាគ្រិស្តនាថ្ងៃអាទិត្យម្សិលមិញនេះ ដែលជាលទ្ធផលបានបន្សល់ទុកមនុស្សស្លាប់ និងរបួសជាច្រើននាក់។ នេះបើតាមការចេញផ្សាយ​ដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃចន្ទ ទី១០ ខែមេសា ឆ្នាំ២០១៧។

សេចក្តីប្រកាស​ខាងលើនេះ​ត្រូវបានធ្វើឡើង នាវេលាល្ងាចថ្ងៃអាទិត្យ​ម្សិលមិញពោលនៅប៉ុន្មានម៉ោង ក្រោយការបំផ្ទុះគ្រាប់ចំនួនពីរកន្លែង​ក្នុងទីក្រុងភាគខាងជើង​ប្រទេសអេហ្ស៊ីប ដែលបានស្លាប់ជីវិតមនុស្សសរុប​កើនដល់​ចំនួន៤៤នាក់ និងបណ្តាល​ឲ្យជាង​១២០នាក់ផ្សេងទៀត​បានទទួល​រងរបួស​ជាទម្ងន់ ហើយជនរង​គ្រោះភាគច្រើន​គឺជាអ្នក​ថ្វាយបង្គំ ដែលបាន​ទៅចូលរួមពិធីបុណ្យ​សាសនា Palm Sunday។

យោងតាម​ការឲ្យដឹងពីក្រសួង​សុខាភិបាល​អេហ្ស៊ីប ការវាយប្រហារ​នៅព្រះវិហារ Mar Girgis នៃទីក្រុង Tanta ក្នុងខេត្ត Gharbiya បាន​បន្សល់​​ទុក​មនុស្សស្លាប់យ៉ាងតិច​ចំនួន២៧នាក់ និងរបួស៧៨នាក់ ខណៈការបំផ្ទុះគ្រាប់បែកអត្តឃាតបន្ទាប់មកមួយទៀតនៅព្រះវិហារ​ Saint Mark នៃទីក្រុង Alexandria បានសម្លាប់ជីវិតមនុស្សចំនួន១៧នាក់ និងបានបង្កឲ្យ៤៨នាក់ទៀតរបួសជាទម្ងន់។

គួរបញ្ជាក់ថា ជុំវិញទង្វើដ៏ខ្មៅងងឹតនេះក្រុមអ្នកភេរវករ ISIS បានចេញមុខអះអាងថាជាស្នាដៃរបស់ខ្លួន៕