(អេហ្ស៊ីប)៖ អាជ្ញាធរអេហ្ស៊ីបបានឱ្យដឹងថា ចំនួនអ្នកស្លាប់នៅក្នុងវាយប្រហារដោយបំផ្ទុះគ្រាប់បែកដ៏ប្រល័យ ទៅលើព្រះវិហារអ្នកកាន់សាសគ្រិស្ដស្ថិតនៅភាគខាងជើង នៃប្រទេសបានកើនឡើងដល់ ៤៤នាក់ និងជាច្រើននាក់ផ្សេងទៀតបានរងរបួស។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃចន្ទ ទី១០ ខែមេសា ឆ្នាំ២០១៧។

ប្រភពដដែល​បានបញ្ជាក់ទៀតថា ការវាយប្រហារ​ដោយបំផ្ទុះគ្រាប់បែកចំនួនពីរលើក​កាលពីថ្ងៃអាទិត្យ ដែលបានកើត​ឡើងនៅឯព្រះវិហារគ្រិស្ត St. George Coptic ស្ថិតនៅក្នុងទីក្រុង Tanta នៃភាគខាងជើង​រដ្ឋធានីគែរបានសម្លាប់មនុស្ស​២៧នាក់ ហើយប៉ុន្មាន​ម៉ោងក្រោយមក មនុស្ស​១៧នាក់ផ្សេងទៀត​ក៏បានស្លាប់ផងដែរ ដោយសារតែ​ការវាយប្រហារ​បំផ្ទុះគ្រាប់ទី២ នៅឯខាងក្រៅព្រះវិហារគ្រិស្ដ St Mark's Coptic ក្នុងទីក្រុង Alexandria។

គួរបញ្ជាក់ថាក្រុម ISIS ​បានអះអាងថា​ខ្លួនជាអ្នកនៅពីក្រោយ​ការវាយប្រហារ​ដ៏អាក្រក់នេះ ខណៈការបំផ្ទុះគ្រាប់បែកទំាងពីរលើកនេះ​បានបណ្ដាលឱ្យមនុស្ស ៧១នាក់រងរបួសនៅក្នុងទីក្រុង Tanta និង៣៥នាក់​នៅឯទីក្រុង Alexandria៕