(ម៉ូស្គូ)៖ ប្រព័ន្ធមីស៊ីលការពារដែនអាកាសរុស្ស៊ីដ៏ទំនើបៗ និងពោរពេញដោយអានុភាពត្រូវបានដាក់ឲ្យ ប្រុងជើងការជាប់២៤ម៉ោង ដើម្បីយាមកាមមូលដ្ឋានយោធារបស់រុស្ស៊ី ដែលប្រចាំការនៅក្នុងប្រទេសស៊ីរី បន្ទាប់ពីសហរដ្ឋអាមេរិកបានបើកការវាយប្រហារមីស៊ីលចំនួន ៥៩គ្រាប់ទៅលើបន្ទាយទ័ពអាកាសរបស់ រដ្ឋាភិបាលលោក អាស្សាដ។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅព្រឹកថ្ងៃសៅរ៍ ទី០៨ ខែមេសា ឆ្នាំ២០១៧។
អ្នកនាំពាក្យក្រសួងការពារជាតិរុស្ស៊ីលោក Igor Konashenkov បានថ្លែងថា «ប្រព័ន្ធមីស៊ីលការពារដែនអាកាសនៅក្នុងប្រទេសស៊ីរី គឺសំដៅលើការការពារមូលដ្ឋានព្រមទាំងគោលដៅមួយចំនួន។ ប្រព័ន្ធមីស៊ីល S-400, S-300, និង Pantsir-S1 នឹងផ្តល់ការការពារយ៉ាងរឹងមាំសម្រាប់មូលដ្ឋានយោធារបស់រុស្ស៊ីនៅទីនោះ ពីការវាយប្រហារតាមផ្លូវអាកាស»។ អ្នកនាំពាក្យរូបនេះបានសង្កត់ធ្ងន់ថា ប្រព័ន្ធមីស៊ីល S-400 និង Panstsir អាចធានាបានទាំងស្រុងចំពោះការពារអង្គភាពជើងអាកាសរុស្ស៊ីនៅឯបន្ទាយ Hmeymim ខណៈប្រព័ន្ធមីស៊ីលមួយក្រុមទៀត ដែលត្រូវបានដាក់ពង្រាយនៅស៊ីរីរួមផ្សំដោយ S-300 និង Panstsir កំពុងប្រុងជើងការពេញ២៤ម៉ោងដូចគ្នា ដើម្បីការពារមជ្ឈមណ្ឌលដឹកជញ្ជូនរបស់កងទ័ពជើងទឹករុស្ស៊ី។
គួរបញ្ជាក់ថារុស្ស៊ីបានប្រកាសអំពីគំរោងរបស់ខ្លួន ក្នុងពង្រឹងក៏ដូចជាបង្កើនប្រសិទ្ធភាពនៃប្រព័ន្ធការពារដែនអាកាស នៅក្នុងប្រទេសស៊ីរី បន្ទាប់ពីសហរដ្ឋអាមេរិក បានបាញ់ស្រោចមីស៊ីលចំនួន ៥៩គ្រាប់ចេញពីនាវាចម្បាំងមកទៅលើប្រទេសមជ្ឈិមបូព៌ាមួយនេះ ជាការសងសឹកចំពោះការវាយប្រហារដោយអាវុធគីមីរបស់យន្តហោះចម្បាំងរដ្ឋាភិបាលលោក បាហ្សា អាល់ អាស្សាដ ដែលបានសម្លាប់រង្គាលជីវិតជនស្លូតត្រង់៕
