(អាមេរិក)៖ នៅក្នុងកិច្ចប្រជុំកំពូលរវាងមហាអំណាចទាំងពីរ ប្រធានាធិបតីអាមេរិកលោក ដូណាល់ ត្រាំ បានជំរុញឲ្យ​ប្រធានាធិបតីចិនលោក ស៊ី ជិនពីង ខិតខំបន្ថែមទៀតក្នុងការដោះស្រាយ កម្មវិធីនុយក្លេអ៊ែររបស់ប្រទេសកូរ៉េខាងជើង និងជួយកាត់បន្ថយចន្លោះនៃឱនភាពសេដ្ឋកិច្ច​របស់ សហរដ្ឋអាមេរិកជាមួយ និងទីក្រុងប៉េកាំង។ នេះបើតាមការ​ចេញផ្សាយដោយសារព័ត៌មាន Channel News Asia នៅមុននេះបន្តិចនា​ព្រឹកថ្ងៃសៅរ៍ ទី០៨ ខែមេសា ឆ្នាំ២០១៧។

ជាការឆ្លើយតបលោក ស៊ី ជិនពីង បានព្រមព្រៀងលើគំរោងមួយរយៈពេល១០០ថ្ងៃ សម្រាប់ការជជែកពិភាក្សាអំពី​ការបង្កើន​ការ​នាំចេញ​របស់ អាមេរិក និងការកាត់បន្ថយកំណើនពាណិជ្ជរបស់ចិន ជាមួយទីក្រុងវ៉ាស៊ីនតោន។ ម៉្យាងវិញទៀតលោក​ប្រធានាធិបតីចិន ក៏បានយល់់​ព្រមក្នុងការបង្កើនកិច្ចសហប្រតិបត្តិការ ក្នុងការទប់ស្កាត់ក៏ដូចជារារាំង និងដាក់សម្ពាធទៅលើ​កម្មវិធីមីស៊ីលផ្លោង និងអាវុធនុយក្លេអ៊ែររបស់​កូរ៉េខាងជើងផងដែរ ទោះបីជាលោក ស៊ី ពុំទាន់ផ្តល់នូវវិធីសាស្រ្តថ្មីណាមួយ សម្រាប់ការ​បំបាក់អត្តចរិតចចេសរឹងរូសរបស់ទីក្រុងព្យុងយ៉ាង​យ៉ាងណាក្តី។

គួរបញ្ជាក់ថាលោក ដូណាល់ ត្រាំ ក៏បានលើកឡើងពីក្តីព្រួយបារម្ភរបស់រដ្ឋាភិបាលទីក្រុងវ៉ាស៊ីនតោន ចំពោះសកម្មភាព​ទីក្រុងប៉េកាំងនៅ​សមុទ្រចិន ខាងត្បូងផងដែរ ខណៈដំណើរទស្សនកិច្ចរយៈពេលពីរថ្ងៃ​របស់​ប្រធានាធិបតី​ចិនលោក ស៊ី ជិនពីង នៅសហរដ្ឋអាមេរិក​ត្រូវ​​បាន​​បញ្ចប់​​ ហើយលោក ត្រាំ ក៏បានទទួលយកយ៉ាងពេញចិត្តនូវការអញ្ជើញរបស់លោក ស៊ី ដើម្បីទៅបំពេញទស្សនកិច្ច​នៅ​ឯ​ប្រទេស​ចិន​ថែមទៀត​ផងនៅក្នុងឆ្នាំ២០១៧នេះ ប៉ុន្តែកាលបរិច្ឆេទច្បាស់លាស់​ពុំទាន់ត្រូវ​កំណត់នៅឡើយទេ៕