(ស៊ុយអែត)៖ ប្រតិបត្តិការតាមប្រមាញ់ទ្រង់ទ្រាយធំ បាននិងកំពុងប្រព្រឹត្តទៅយ៉ាងស្វះស្វែង ដើម្បីតាមរកចាប់ខ្លួន អ្នកបើក​ដែល​បានលួច​រថយន្តធុនធំមួយគ្រឿង យកទៅបើកបំបុកក្រុមអ្នកដំណើរថ្មើរជើងជាច្រើននាក់ នៅខាងក្រៅហាង​លក់ទំនិញ​ដ៏មមាញឹកមួយកន្លែង ស្ថិតចំ​កណ្តាលទីក្រុង Stockholm នៃប្រទេសស៊ុយអែត នាថ្ងៃសុក្រម្សិលមិញនេះ ដែលជាលទ្ធផល​បានសម្លាប់ជីវិតមនុស្សកើនដល់បួននាក់ និង​១៥នាក់ផ្សេងទៀតរងរបួសជាទម្ងន់។ នេះបើតាមការចេញផ្សាយ​ដោយសារ​ព័ត៌មាន Channel News Asia នៅមុននេះបន្តិចនាព្រឹកថ្ងៃសៅរ៍ ទី០៨ ខែមេសា ឆ្នាំ២០១៧។

មេបញ្ជាការប៉ូលិសជាតិលោក Stefan Hecktor បានឲ្យដឹងថា អ្វីដែលសមត្ថកិច្ចទទួលបាន នាពេលបច្ចុប្បន្នគឺថា វាគឺជាការវាយ​ប្រហារភេរវកម្ម។ ជាមួយគ្នានាយករដ្ឋមន្រ្តីស៊ុយអែតលោក Stefan Lofven ដែលបានផ្អាកដំណើរទស្សនកិច្ច​ទៅកាន់ភាគ​និរតីប្រទេស​ ហើយវិលត្រឡប់មករដ្ឋធានី Stockholm វិញភ្លាមៗ បន្ទាប់ពីបានជ្រាបដំណឹងដ៏តក់ស្លុតនេះនោះ ក៏បានលើក​ឡើងថា អ្វីៗគ្រប់យ៉ាង​បាន​ចង្អុល​បង្ហាញថា ជាអំពើភេរវកម្ម។

គួរបញ្ជាក់តាមមន្រ្តីប៉ូលិសស៊ុយអែតថា បុរសចំនួនពីរនាក់ហើយ ត្រូវបានចាប់ខ្លួនក្រោមបទសង្ស័យថា មានជាប់ពាក់ព័ន្ធ​ជាមួយ​ករណីវាយ​ប្រហារនេះ ក៏ប៉ុន្តែអ្នក​បើករថយន្តបង្កហេតុផ្ទាល់ កំពុងស្ថិតនៅក្នុងការរត់គេចខ្លួននៅឡើយទេ៕