(ម៉ូស្គូ)៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចាត់ទុកថា ការវាយប្រហាររបស់សហរដ្ឋអាមេរិក ប្រឆាំងនឹងមូលដ្ឋានទ័ពអាកាសស៊ីរី គឺជាការឈ្លានពានលើរដ្ឋមួយ ហើយដែលនេះគឺជាទង្វើរំលោភទាំងស្រុង លើច្បាប់អន្តរជាតិ។ មិនតែប៉ុណ្ណោះវាក៏អាចនឹងបំផ្លាញទំនាក់ទំនងរវាងសហរដ្ឋអាមេរិក និងរុស្ស៊ីផងដែរ ខណៈរដ្ឋាភិបាលអ៊ីរ៉ង់បានចេញមុខថ្កោលទោសកម្រិតធ្ងន់បំផុត ទៅនឹងទង្វើរបស់អាមេរិក។ នេះបើតាមអ្នកនាំពាក្យវិមានក្រឹមឡំាង ដកស្រង់ដោយសារព័ត៌មាន Channel News Asia នៅរសៀលថ្ងៃសុក្រ ទី០៧ ខែមីនា ឆ្នាំ២០១៧។
ថ្លែងនៅក្នុងសន្និសីទសារព័ត៌មាន លោក ឌីមីទ្រី ប៉េស្កូវ បាននិយាយដូច្នេះថា «លោកប្រធានាធិបតីពូទីន បានចាត់ទុកថា ការវាយប្រហាររបស់សហរដ្ឋអាមេរិកប្រឆាំងនឹងស៊ីរី គឺជាទង្វើឈ្លានពានលើដែនអធិបតេយ្យភាពនៃរដ្ឋមួយ និងរំលោភច្បាប់អន្តរជាតិយ៉ាងធ្ងន់ធ្ងរ ដោយឈរលើលេសដែលទីក្រុងវ៉ាស៊ីនតោន បានបង្កើតឡើង។ ក៏ប៉ុន្តែអ្វីដែលសំខាន់នោះគឺថា វាក៏អាចនឹងបំផ្លាញផងដែរដល់ទំនាក់ទំនងរវាងប្រទេសទំាងពីរ»។ ដោយឡែកជុំវិញការវាយប្រហារនេះដែរ ក្រុមអង្គការឃ្លាំមើលសិទ្ធិមនុស្សស៊ីរី អះអាងថា កងទ័ពស៊ីរីយ៉ាងហោចណាស់០៤នាក់ បានស្លាប់។
គួរបញ្ជាក់ថាបើតាមប្រធានាធិបតីអាមេរិក លោក ដូណាល់ ត្រាំ ការវាយប្រហារដោយគ្រាប់មីស៊ីល ៥៩គ្រាប់ បាញ់ចេញពីនាវាពិឃាតអាមេរិកឈរជើង នៅតំបន់សមុទ្រមេឌីទែរ៉ាណេទៅលើមូលដ្ឋានទ័ពអាកាសស៊ីរីកាលពីយប់ថ្ងៃព្រហស្បតិ៍ ធ្វើឡើងផ្អែកលើផលប្រយោជន៍សន្តិសុខជាតិអាមេរិក និងដើម្បី ជាការឆ្លើយតបទៅនឹងអ្វីដែលលោកផ្ទាល់ចោទថា របបស៊ីរីបានប្រើប្រាស់ប្រើអាវុធគីមី សម្លាប់ជនស៊ីវិលរាប់សិបនាក់នៅខេត្ត Idlib កាលពីថ្ងៃអង្គារ៕
