(វ៉ាស៊ីនតោ)៖ អនុប្រធានាធិបតីអាមេរិកលោក Mike Pence នឹងធ្វើដំណើរទៅកាន់ប្រទេសកូរ៉េខាងត្បូង ជប៉ុន ឥណ្ឌូណេស៊ី អូស្រ្តាលី និង​រដ្ឋ​ហាវ៉ៃ នៅក្នុងខែមេសានេះ ដើម្បីប្រើប្រាស់ការបំពេញទស្សនកិច្ចជាផ្លូវការលើកដំបូងរបស់លោក ទៅកាន់តំបន់អាស៊ី-ប៉ាស៊ីហ្វិក ដើម្បីជជែក​ពិភាក្សាអំពីគោលនយោបាយសេដ្ឋកិច្ច និងផ្តល់ទំនុកចិត្តសាជាថ្មីម្តងទៀត អំពីការប្តេជ្ញាដ៏មុះមុតឥតងាករេ របស់ទី​ក្រុង​វ៉ាស៊ីន​តោន​ចំពោះ​​សម្ព័ន្ធមិត្ត។ នេះបើតាមការចេញផ្សាយដោយសារព័ត៌មាន Channel News Asia នៅយប់ថ្ងៃទី០៦ ខែមេសា ឆ្នាំ២០១៧។

គួរបញ្ជាក់ថា យោងតាមសេចក្តីថ្លែងការណ៍របស់សេតវិមាន ចាប់ពីថ្ងៃទី១៥ ដល់២៥ ខែមេសា លោក Pence នឹងអមដំណើរដោយភរិយា​និង​កូនស្រីចំនួនពីរនាក់។ លោកអនុប្រធានាធិបតីអាមេរិក នឹងទៅដល់ទីក្រុងសេអ៊ូល នាថ្ងៃទី១៦ ខែមេសា នៅមុនពេលបន្តការធ្វើដំណើរទៅ​កាន់ទីក្រុងតូក្យូ នៅថ្ងៃទី១៨, ទីក្រុងហ្សាការតានាថ្ងៃទី២០, ទីក្រុងស៊ីដនីនៅថ្ងៃទី២២, និងទីក្រុងហូណូលូលូ នាថ្ងៃទី២៤ ខែមេសា៕