(បាងកក)៖ ព្រះមហាក្សត្រថៃទ្រង់ Maha Vajiralongkorn បានឡាយព្រះហស្ថលេខាហើយ នៅថ្ងៃព្រហស្បតិ៍នេះលើរដ្ឋធម្មនុញ្ញថ្មី ដែលនេះគឺជាជំហានដ៏សំខាន់មួយឆ្ពោះទៅរកការរៀបចំ ការបោះឆ្នោតសកលតាមពាក្យសន្យារបស់រដ្ឋាភិបាលយោធាថៃ បន្ទាប់ពីមានរដ្ឋប្រហារកាលពីឆ្នាំ២០១៤ ទម្លាក់លោកស្រី យីងឡាក់ ស៊ីណាវ៉ាត់ ពីនាយករដ្ឋមន្ត្រី។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅល្ងាចថ្ងៃព្រហស្បតិ៍ ទី០៦ ខែមេសា ឆ្នាំ២០១៧។

យោងតាម​ប្រព័ន្ធផ្សព្វផ្សាយ​នៅក្នុងស្រុក ទ្រង់ Maha Vajiralongkorn បានឡាយព្រះហស្ថលេខា​អនុម័តលើរដ្ឋធម្មនុញ្ញ​ថ្មី ដែលនឹង​បង្កើតនីតិវិធី ដំណើរការ​ការរៀបចំការ​បោះឆ្នោត​យ៉ាងយូរនៅឆ្នាំ​ក្រោយនេះ។ ជាមួយគ្នានោះដែរ អ្នកទទួលខុស​ត្រូវខាងបរមរាជវាំងថៃ​ម្នាក់​ក៏បានបញ្ជាក់​ដែរថា «រដ្ឋធម្មនុញ្ញ​នៃព្រះរាជាណាចក្រថៃ ត្រូវបាន​ប្រកាសឱ្យប្រើ​ហើយ ដូច្នេះប្រជាជន​ថៃគួរតែរួបរួមគ្នា​ការពាររដ្ឋធម្មនុញ្ញ​នេះ ដើម្បីរក្សាលិទ្ធិ ប្រជាធិបតេយ្យ និងដែនអធិបតេយ្យភាព​របស់ថៃ»។

គួរបញ្ជាក់ថារដ្ឋធម្មនុញ្ញថ្មីនេះត្រូវបានអនុម័ត​ នៅក្នុងការបោះឆ្នោត​ប្រជាមតិ​កាលពីសីហា ឆ្នាំ២០១៦ ហើយវា​នឹងត្រូវជំនួសរដ្ឋធម្មនុញ្ញបណ្ដោះ​អាសន្នបច្ចុប្បន្ន ក្រោយរដ្ឋប្រហារ​ឆ្នាំ២០១៤។ ក៏ប៉ុន្តែគេរំពឹងដែរថា តាមរយៈរដ្ឋធម្មនុញ្ញថ្មី​នេះ ទ្រង់ Maha Vajiralongkorn នឹងមាន​អំណាចធំ ជាងព្រះបិតា Bhumibol Adulyadej ដែលបាន​សោយទិវង្គតទៅទៀត៕