(វ៉ាស៊ីនតោន)៖ លោក Jack Keane ដែលជាជម្រើសដំបូង របស់ប្រធានាធិបតីអាមេរិកលោក ដូណាល់ ត្រាំ សម្រាប់តំណែងជារដ្ឋមន្រ្តីការពារជាតិនោះបានព្រមានចំៗថា កម្មវិធីនុយក្លេអ៊ែររបស់កូរ៉េខាងជើង ប្រហែលនៅទីបំផុតនឹងតម្រូវបង្ខំឲ្យសហរដ្ឋអាមេរិក ប្រើប្រាស់នូវអ្វីដែលរូបលោកបានហៅថា «ជាជម្រើសនៅសេសសល់ចុងក្រោយ» សម្រាប់ទីក្រុងវ៉ាស៊ីនតោន ពោលគឺការវាយប្រហារដោយ កម្លាំងយោធានៅក្នុងទ្រង់ទ្រាយធំតែម្តង។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅមុននេះបន្តិចនារសៀលថ្ងៃព្រហស្បតិ៍ ទី០៦ ខែមេសា ឆ្នាំ២០១៧។
ថ្លែងក្នុងកិច្ចសម្ភាសន៍មួយជាមួយសារព័ត៌មាន Times of London លោក Keane បានលើកឡើងថា «ការវាយប្រហារដោយសង្រ្គប់ ទៅលើមូលដ្ឋានអាវុធនុយក្លេអ៊ែរក្រោមដី រួមទាំងកងកម្លាំងឆ្លើយតបកាំភ្លើងធំ និងគ្រាបរ៉ុក្កែត ក៏ដូចជាគោលដៅថ្នាក់ដឹកនាំនៃរបបដឹកនាំទីក្រុងព្យុងយ៉ាង ប្រហែលជាជម្រើសចុងក្រោយតែមួយគត់ដែលនៅសល់ ហើយយើងកំពុងតែឆ្ពោះយ៉ាងលឿន និងក្នុងសភាពដ៏គ្រោះថ្នាក់ទៅរកជម្រើសនៃការប្រើប្រាស់កម្លាំងយោធា»។
ការគូសបញ្ជាក់ខាងលើនេះស្របទៅនឹងអ្វីដែលលោក ដូណាល់ ត្រាំ ផ្ទាល់បាននិយាយនៅមុនជំនួបរបស់លោកជាមួយមេដឹកនាំចិនលោក ស៊ី ជីនពីង នៅថ្ងៃព្រហស្បតិ៍សប្តាហ៍នេះ (ពេលវេលានៅអាមេរិក)។ លោក ត្រាំ បានថ្លែងថា សហរដ្ឋអាមេរិកត្រៀមខ្លួនជាស្រេចសម្រាប់ជ្រើសយកវិធានការណ៍ផ្សេងទៀត នៅក្នុងករណីដែលទីក្រុងប៉េកាំងមិនព្រមដាក់សម្ពាធធ្ងន់គ្រប់គ្រាន់ ដើម្បីឲ្យរបបដឹកនាំលោក គីម ជុងអ៊ុន បោះបង់មហិច្ឆតានុយក្លេអ៊ែររបស់ខ្លួនឯងចោលទេនោះ។
នៅក្នុងបទសម្ភាសន៍ដដែលនេះលោក Jack Keane បានបន្តថា «ការដាក់ទណ្ឌកម្មនាពេលកន្លងមក មិនបានការអ្វីនោះឡើយប្រឆាំងនឹងកូរ៉េខាងជើង ហើយខ្ញុំមានមន្ទិលជាខ្លាំងថា ការធ្វើបែបនេះបន្តទៀតនឹងមានប្រសិទ្ធភាពនោះ។ ម៉្យាងវិញទៀតខ្ញុំក៏មិនយល់ថា ទណ្ឌកម្មប្រឆាំងនឹងចិនដែលជាសម្ព័ន្ធមិត្តតែគត់របស់ទីក្រុងព្យុងយ៉ាង នឹងជួយអ្វីបានជាដុំកុំភួនប្រសើរជាងនេះដែរ»។ លោក Keane បានលើកឡើងថា អតីតប្រធានាធិបតីរបស់យើងបីរូប បានចំណាយពេលដល់ទៅជាង២០ឆ្នាំ ប៉ុន្តែចុងក្រោយនៅតែមិនអាចបញ្ឈប់កម្មវិធីនុយក្លេអ៊ែររបស់កូរ៉េខាងជើងបាន។ ដូច្នេះនាពេលនេះមេទ័ពអាមេរិករូបនេះ សង្ឃឹមថារដ្ឋាភិបាលលោក ដូណាល់ ត្រាំ នឹងអាចទទួលជោគជ័យ។
គួរបញ្ជាក់ថាលោក Jack Keane ដែលជានាយឧត្តមសេនីយ៍ផ្កាយបួនចូលនិវត្តន៍ និងជានាយកវិទ្យាស្ថានសម្រាប់ការសិក្សាអំពីសង្រ្គាម បានបដិសេធចោលនូសំណើរបស់លោក ត្រាំ ក្នុងការកាន់តួនាទីជារដ្ឋមន្រ្តីការពារជាតិនៃសហរដ្ឋអាមេរិក ពីព្រោះតែបញ្ហាផ្ទាល់ខ្លួនពាក់ព័ន្ធនឹងមរណភាពនៃភរិយារបស់លោក៕
