(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថា គោលជំហររបស់លោក ចំពោះប្រធានាធិបតីស៊ីរី លោក បាស្សា អាល់ អាស្សាដ និងប្រទេសស៊ីរីបានផ្លាស់ប្ដូរហើយ បន្ទាប់ពីមានការប្រើប្រាស់អាវុធគីមីជាថ្មីនៅស៊ីរី។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃព្រហស្បតិ៍ ទី០៦ ខែមេសា ឆ្នាំ២០១៧។
លោក ដូណាល់ ត្រាំ លើកឡើងបែបនេះនៅក្នុងឱកាសធ្វើសន្និសីទសារព័ត៌មានរួមគ្នាជាមួយព្រះមហាក្សត្រ ហ៊្សកដានី ព្រះចៅ Abdullah ដែលបំពេញទស្សនកិច្ច មកកាន់សហរដ្ឋអាមេរិកកាលពីថ្ងៃពុធ។ ថ្លែងនៅចំពោះមុខក្រុមអ្នកសារព័ត៌មាន លោក ត្រាំ បានលើកឡើងយ៉ាងដូច្នេះថា «វាជាការឆ្លងកាត់បន្ទាត់ក្រហម នៅពេលអ្នក (លោក អាស្សាដ) សម្លាប់កុមារ និងទារកគ្មានកំហុស ដោយអាវុធគីមី (...) ហើយទង្វើដ៏ឃោរឃៅប្រឆាំងនឹងមនុស្សជាតិបែបនេះ មិន គួរអត់ឱនឱ្យជាដាច់ខាត»។
ព្រមពេលជាមួយគ្នាប្រធានាធិបតីអាមេរិករូបនេះ មិនបានបញ្ជាក់ឡើយពីវិធានការដែលសហរដ្ឋអាមេរិក ត្រូវធ្វើដោយគ្រាន់តែលោកបានទម្លាក់កំហុស នៃការវាយប្រហារដោយអាវុធគីមីថាជាការទទួលខុសត្រូវរបស់រដ្ឋាភិបាលលោក អាស្សាដ។ «ទង្វើដ៏គួរឱ្យស្អប់ខ្ពើមប្រព្រឹត្តឡើងដោយរបប អាស្សាដ មិនអាចអត់ឱនឱ្យបានឡើយ រីឯគោលជំហររបស់ខ្ញុំចំពោះលោក អាស្សាដ ក៏បានផ្លាស់ប្ដូរដែរ ហើយអ្វីដែលបានកើតឡើងកាលពីថ្ងៃម្សិលមិញ (ថ្ងៃអង្គារ) ជារឿងមិនអាចទទួលយកបានសម្រាប់ខ្ញុំ»។
គួរបញ្ជាក់ថាបើតាមតួលេខថ្មី មនុស្សយ៉ាងហោចណាស់ ៨៦នាក់ ក្នុងនោះមានកុមារ ២០នាក់ ត្រូវបានសម្លាប់នៅក្នុងការវាយប្រហារដោយគ្រប់គ្នាជឿជាក់ថាជាការប្រើបា្រស់អាវុធគីមីនៅក្នុងទីក្រុង Khan Sheikhun នៃខេត្ត Idlib កាលពីថ្ងៃអង្គារ។ ការប្រើប្រាស់អាវុធគីមីរបៀបនេះនៅក្នុងសង្រ្គាមស៊ីរី ក៏ធា្លប់ត្រូវបានគេរាយការណ៍ចាប់តាំងពីឆ្នាំ២០១៣មកម្លេះ៕
