(សេអ៊ូល)៖ ខណៈកំពុងប្រឈមមុខកាន់តែខ្លាំងជាមួយកូរ៉េខាងជើង កូរ៉េខាងត្បូងនៅថ្ងៃព្រហស្បតិ៍នេះ អះអាងថា ខ្លួនបានសាកល្បងដោយជោគជ័យនូវមីស៊ីលផ្លោងប្រភេទ Hyunmoo ដែលអាចរត់បានចំងាយ ៨០០គីឡូម៉ែត្រ និងបាញ់ដល់គ្រប់ទីតាំងនៅលើទឹកដីកូរ៉េខាងជើង។ នេះបើតាមប្រភពពីក្រសួង ការពារជាតិកូរ៉េខាងត្បូង ដកស្រង់ដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃព្រហស្បតិ៍ ទី០៦ ខែមេសា ឆ្នាំ២០១៧។
ប្រភពដដែលបានឱ្យដឹងទៀតថា ជោគជ័យនៃការបាញ់សាកល្បងមីស៊ីលនេះ អាចជាសារព្រមានមួយប្រាប់កូរ៉េខាងជើង ដែលកំពុងបន្តអភិវឌ្ឍន៍កម្មវិធីអាវុធនុយក្លេអ៊ែរ និងមីស៊ីលផ្លោង ដែលជាការរំលោភយ៉ាងធ្ងន់ធ្ងរលើដំណោះស្រាយក្រុមប្រឹក្សាសន្តិសុខ UN»។ ចំណែកឯ រដ្ឋមន្ត្រីការពារជាតិកូរ៉េខាងត្បូង លោក ហាន់ មីនគូ ក៏បានចូលរួមដោយផ្ទាល់ក្នុងការធ្វើតេស្ត មីស៊ីលនេះដែរ។
គួរបញ្ជាក់ថាកូរ៉េខាងត្បូងមានប្រភេទមីស៊ីលដូចជា Hyunmoo-2A អាចបាញ់បានចំងាយ ៣០០គីឡូម៉ែត្រ, Hyunmoo-2B ៥០០គីឡូម៉ែត្រ និងមីស៊ីលផ្លោង Hyunmoo-3 អាចបាញ់បានចំងាយ១,០០០គីឡូម៉ែត្រ៕
