(កូបូតា)៖ ចំនួនអ្នកបាត់បង់ជីវិតដោយសារគ្រោះរអិលបាក់ដីដ៏អាក្រក់ នៅភាគខាងត្បូងប្រទេសកូឡុំប៊ី បានកើនដល់២៩០នាក់ហើយមកទល់ថ្ងៃពុធនេះ។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនារសៀលថ្ងៃពុធ ទី០៥ ខែមេសា ឆ្នាំ២០១៧។
ម៉្យាងវិញទៀតក្រៅពីអ្នកស្លាប់ មនុស្សចំនួន៣៣២នាក់ផ្សេងទៀតបានទទួលរងរបួសជាទម្ងន់ នៅក្នុងហេតុការណ៍រអិលបាក់ដី ដែលបានវាយប្រហារទៅលើក្រុង Mocoa នៃប្រទេសកូឡុំប៊ីកាលពីថ្ងៃសៅរ៍សប្តាហ៍មុននេះ បន្ទាប់ពីមានទន្លេចំនួនបីបានជន់លិច ដោយសារតែការធ្លាក់ភ្លៀងជោគជាំឥតឈប់ឈរជាច្រើនថ្ងៃបន្តបន្ទាប់គ្នា។ ព្រមពេលជាមួយគ្នាយោងតាមកាកបាតក្រហម ប្រជាជនប្រមាណ ៤៥,០០០នាក់ ក្នុងចំណោម ៧០,០០០នាក់រស់នៅទីក្រុងនេះ បានទទួលរងផលប៉ះពាល់ពីព្រោះគ្រោះមហន្តរាយដ៏អាក្រក់។
គួរបញ្ជាក់ថាអាជ្ញាធរកូឡុំប៊ីក៏បានបើកការស៊ើបអង្កេត ដើម្បីកំណត់ថាតើវិធានការទប់ស្កាត់ និងបង្កាបែបនេះ ប្រហែលជាអាចជួយរារាំងកុំឲ្យគ្រោះធម្មជាតិនេះ កើតមានឡើងបានទៀតនាពេលអនាគត៕
