(មូស្គូ)៖ ក្រសួងការពាជាតិរុស្ស៊ីនៅថ្ងៃអង្គារនេះ បានទទួលស្គាល់ហើយថា ការវាយប្រហារតាមផ្លូវអាកាស ដោយកងកម្លាំងរដ្ឋាភិបាលស៊ីរី ទៅលើឃ្លំាងស្ដុកអាវុធគីមីពុលរបស់ក្រុមឧទ្ទាម បានផ្ដាច់យកអាយុជីវិត មនុស្សជិត១០០នាក់ ក្នុងនោះមានកុមារ២០នាក់។ នេះបើតាមការចេញផ្សាយដោយសារព័ត៌មាន CNN នៅរសៀលថ្ងៃពុធ ទី០៥ ខែមេសា ឆ្នាំ២០១៧។

យោងតាមសេចក្ដីថ្លែងការណ៍មួយបង្ហោះនៅលើ Facebook page របស់ខ្លួនក្រសួងការពារជាតិរុស្ស៊ី បានលើកឡើងថា «កងកម្លាំងរដ្ឋាភិបាលស៊ីរី បានវាយប្រហារលើឃ្លំាងស្ដុកអាវុធគីមី​នៃក្រុមឧទ្ទាម ស្ថិតនៅភាគខាងកើត​ជាយក្រុង Khan Sheikhun។ ក៏ប៉ុន្តែព្រមពេល​ជាមួយគ្នា​ក្រសួងនេះដដែល ក៏បានអះអាង​ថា សារធាតុគីមីពុល​ដែលសម្លាប់​ប្រជាជនស៊ីរី​ស្លូតត្រង់ គឺភាយចេញពី​ឃ្លំាងស្ដុកអាវុធទំាងនេះ ពោលគឺកងកម្លំាង​រដ្ឋាភិបាលស៊ីរី មិនបានប្រើប្រាស់អាវុធគីមីនោះទេ។

ដោយឡែកជុំវិញបញ្ហានេះដែរ សហរដ្ឋអាមេរិក ចក្រភពអង់គ្លេស និងប្រទេសបារាំង នៅថ្ងៃនេះ បានលើកឡើងនូវដំណោះស្រាយមួយរបស់ក្រុមប្រឹក្សាសន្តិសុខអង្គការសហប្រជាជាតិ ដើម្បីថ្កោលទោស​ទៅលើការវាយប្រហារដោយអាវុធគីមី ដ៏សាហាវឃោឃៅនេះ ហើយវាទំនងជា​នឹងត្រូវដាក់ឲ្យ​បោះឆ្នោតសម្រេច​នៅថ្ងៃពុធ​សប្តាហ៍នេះ (ពេលវេលានៅញូយ៉ក)។ ក៏ប៉ុន្តែយ៉ាងណា​គេពុំរំពឹងឡើយ​ថា​ ដំណោះស្រាយនេះនឹងត្រូវ​បានអនុម័ត​ត្បិតរុស្ស៊ីមុខជា​នឹងបោះឆ្នោតវ៉េតូ ឬជំទាស់ ដើម្បីការពាររបបស៊ីរី​ដូចដែលខ្លួនធ្លាប់​បានធ្វើនា​ពេលកន្លងមក។  

គួរបញ្ជាក់ថាកងកម្លាំងរដ្ឋាភិបាលស៊ីរី​បានទាត់ចោលការចោទប្រកាន់ថា ខ្លួនបានប្រើប្រាស់អាវុធគីមី រីឯទីក្រុងម៉ូស្គូ។ សង្រ្គាមស៊ីរីអូស​បន្លាយពេលជាង ០៦ឆ្នាំមកនេះ បានផ្ដាច់យកអាយុ​ជីវិតប្រជាជនស៊ីរី ច្រើនជាង ២៥០,០០០នាក់ និងជិត០៥លាននាក់​រត់ចេញទៅក្រៅ​ប្រទេសហើយ០៦លាននាក់បាន ផ្លាស់ប្ដូរទីលំនៅនៅក្នុងប្រទេស៕