(តៃប៉ិ)៖ កោះតៃវ៉ាន់គ្រោងនឹងផលិតនាវាមុជទឹកថ្មីចំនួន ០៨គ្រឿង ដើម្បីបង្កើនកម្លាំងកងនាវាមុជទឹក បច្ចុប្បន្នរបស់ខ្លួនដែលសព្វថ្ងៃមានបួនគ្រឿងផលិតឡើងដោយបរទេស ហើយក៏មានអាយុកាលកាន់តែ ចាស់ទៅៗ នៅចំពោះមុខការកើនឡើងនៃឥទ្ធិពលរបស់ប្រទេសចិន។ នេះបើតាមសម្តីរបស់មន្រ្តីជាន់ខ្ពស់ខាងយោធាជើងទឹកតៃវ៉ាន់ ដែលត្រូវបានដកស្រង់ដោយសារព័ត៌មាន Channel News Asia នៅមុននេះបន្តិចនារសៀលថ្ងៃពុធ ទី០៥ ខែមេសា ឆ្នាំ២០១៧។
អគ្គសេនាធិការកងទ័ពជើងទឹកតៃវ៉ាន់លោក Lee Tsung-Hsiao បានថ្លែងដូច្នេះថា «នៅក្នុងគំរោងបង្កើតនាវាមុជទឹកដោយផ្ទាល់ដៃនេះ យើងសង្ឃឹមថានឹងអាចផលិតនាវាមុជទឹកបានចំនួន០៨គ្រឿង» ដែលនេះគឺជាការអះអាងបញ្ជាក់ជាសាធារណៈជាលើកដំបូងបំផុត ស្តីពីចំនួននាវាដែលកំពុងគ្រោងនឹងផលិតឡើង ហើយនាវាមុជទឹកទីមួយត្រូវគេរំពឹងថា នឹងចូលរួមប្រតិបត្តិការបាននៅក្នុងរយៈពេល១០ឆ្នាំទៀត។
គួរបញ្ជាក់ថាយោងតាមអ្នកជំនាញផ្នែកវិស័យការពារជាច្រើន កោះតៃវ៉ាន់ដែលរដ្ឋាភិបាលទីក្រុងប៉េកាំងតែងតែចាត់ទុកថា គ្រាន់តែជាខេត្តមួយរបស់ខ្លួនប៉ុណ្ណោះនោះ មិនធ្លាប់បានសាងសង់នាវាមុជទឹកដោយផ្ទាល់ដៃខ្លួនឯងពីមុនមកឡើយ ហើយនឹងចាំបាច់ត្រូវពឹងផ្អែកលើការគាំទ្របច្ចេកវិទ្យាពីបរទេសដដែល ក្នុងការផលិតនាវាមុជទឹកដែលទំនើបៗបាន។ ដោយឡែកចិនដែលកំពុងតែកើនឡើងឥទ្ធិពលយ៉ាងខ្លាំងក្លានោះ ក៏ពុំធ្លាប់បានបោះបង់ចោលជម្រើសនៃការប្រើប្រាស់កម្លាំងយោធា ដើម្បីដណ្តើមកាន់កាប់យកកោះមួយនេះមកគ្រប់គ្រងវិញផងដែរ៕
