(អាមេរិក)៖ គ្រោះអគ្គីភ័យដ៏ធំមួយកំពុងឆាបឆេះអគាររោងចក្រពាណិជ្ជកម្មមួយកន្លែង នៅតំបន់ភាគខាងនៃទីក្រុង Los Angeles។ នេះបើតាមការចេញផ្សាយដោយសារព័ត៌មាន Associated Press នៅមុននេះបន្តិចនាព្រឹកថ្ងៃអង្គារ ទី០៤ ខែមេសា ឆ្នាំ២០១៧។
អ្នកនាំពាក្យទីភ្នាក់ងារពន្លត់អគ្គីភ័យនៃទីក្រុង Los Angeles លោកស្រី Margaret Stewart បានឲ្យដឹងថា គ្រោះអគ្គីភ័យខាងលើដែលបានកើតឡើងនៅវេលាម៉ោងប្រមាណ ៨៖០០នាទីយប់ថ្ងៃចន្ទសប្តាហ៍នេះ (ម៉ោងនៅក្នុងតំបន់កើតហេតុ) ពីដំបូងឡើងបានចាប់ផ្តើមឆាបឆេះដំបូលនៃរោងចក្រកែច្នៃម្ហូបអាហារនេះ ហើយអណ្តាតភ្លើងកំពុងតែបន្តឥទ្ធិពល ដោយសារបំពង់ហ្គាសដែលលេចធ្លាយនៅក្នុងអគាររោងចក្រនេះ។
គួរបញ្ជាក់តាមលោកស្រី Stewart ដដែល ភ្នាក់ងារពន្លត់អគ្គីភ័យជាង ១០០នាក់ បានផ្លាស់ប្តូរវិធីសាស្រ្តទៅជាការទប់ស្កាត់វិញ ដើម្បីបង្ការអណ្តាតភ្លើងដែលកំពុងឆាបឆេះរោលរាល យ៉ាងសន្ធោសន្ធៅនេះកុំឲ្យបន្តរីករាលដាលបាន។ ដោយឡែកពេលនេះពុំទាន់មានសេចក្តីរាយការណ៍បញ្ជាក់ពីមនុស្សរងគ្រោះ ឬមួយក៏មូលហេតុដែលបង្កជាគ្រោះអគ្គីភ័យនេះនៅឡើយទេ៕
