(វ៉ាស៊ីនតោន)៖ អតីតមហាសេដ្ឋីដែលបានបោះជំហាន ក្លាយទៅជាប្រធានាធិបតីអាមេរិក លោក ដូណាល់ ត្រាំ បានសម្រេចធ្វើតាមពាក្យសន្យារបស់លោក ដោយបរិច្ចាកថវិកាសរុប ៧៨,៣៣៣ដុល្លារអាមេរិក ជាប្រាក់ខែបីខែដំបូងក្នុងតំណែងជាមេដឹកនាំកំពូលពិភពលោក ទៅកាន់មូលនិធិបម្រើសេវាឲ្យឧទ្យានជាតិ (National Park Service)។ នេះបើតាម Channel News Asia ចេញផ្សាយតាមសេចក្តីប្រកាសរបស់សេតវិមានអាមេរិក នៅព្រឹកថ្ងៃអង្គារ ទី០៤ ខែមេសា ឆ្នាំ២០១៧។
គួរបញ្ជាក់ថាអំឡុងយុទ្ធនាការឃោសនារកសំឡេងឆ្នោត លោក ដូណាល់ ត្រាំ ធ្លាប់បានប្រកាសក្តែងៗថា លោកនឹងធ្វើការបរិច្ចាកប្រាក់ខែទាំងអស់ក្នុងមួយឆ្នាំរបស់លោក (៤០០,០០០ដុល្លារ) ទៅជួយបម្រើដល់កិច្ចការងារសង្គមនានា។ លោក ត្រាំ ធ្លាប់បាននិយាយនៅទីក្រុងញូយ៉កកាលពីខែកញ្ញា ឆ្នាំ២០១៥ យ៉ាងដូច្នេះថា «វាមិនមែនជារឿងធំនោះឡើយសម្រាប់ខ្ញុំ»។
ជុំវិញការសម្រេចចិត្តរបស់លោក ត្រាំ ខាងលើនេះដែររដ្ឋមន្ត្រីក្រសួងមហាផ្ទៃអាមេរិកលោក Ryan Zinke ដែលទទួលបន្ទុកលើការតាមដានមើលឧទ្យានជាតិចំនួន ១០០ ក្នុងចំណោម ឧទ្យានជាតិ សារមន្ទីរ និងទីតាំងសាធារណទាំងអស់សរុប ៤១៧កន្លែងបានថ្លែងគាំទ្រ និងបានបញ្ជាក់ពីអារម្មណ៍ពិតរបស់លោក ថា «រំភើបយ៉ាងខ្លាំង» ចំពោះសេចក្តីសម្រេចរបស់ប្រធានាធិបតី៕
