(បូកូតា)៖ មកទល់ពេលនេះក្រុមអ្នកជួយសង្រ្គោះ នៅតែកំពុងបន្តធ្វើការស្វែងរកជនរងគ្រោះដោយសារគ្រោះរអិលបាក់ដី និងទឹកជំនន់ដ៏អាក្រក់កាលពីថ្ងៃសៅរ៍សប្តាហ៍មុននេះ ដែលបង្កការបំផ្លិចបំផ្លាញ យ៉ាងធ្ងន់ធ្ងរដល់ទីក្រុង Mocoa ភាគខាងត្បូងប្រទេសកូឡុំប៊ី និងបានឆក់យកជីវិតមនុស្សកើនដល់២៧៣នាក់ហើយ ដោយក្នុងនោះមានកុមារចំនួន៤៣នាក់ ខណៈជិត ២០០នាក់ទៀតបន្តបាត់ខ្លួន។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅមុននេះបន្តិចនាព្រឹកថ្ងៃអង្គារ ទី០៤ ខែមេសា ឆ្នាំ២០១៧។
ជាមួយគ្នានេះដែរប្រធានាធិបតីកូឡុំប៊ីលោក Santos បានបន្តថា មនុស្សជាច្រើននាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ ប៉ុន្តែមន្ទីរពេទ្យនានាៗនៅក្នុងទីក្រុង Mocoa ដែលស្ថិតក្នុងខេត្ត Putumayo បាននិងកំពុងបន្តទទួលបានថ្នាំសង្កូវ និងសម្ភារៈផ្គត់ផ្គង់ជាបន្តបន្ទាប់។ យោងតាមលោកមកទល់ពេលនេះទីក្រុង Mocoa ទទួលបានសម្ភាៈចម្អិនអាហារចំនួន ២,០០០គ្រឿង ឧបករណ៍សម្អាត ២,៣០០០គ្រឿង ភួយចំនួន៧,០០០ដុំ និងកម្រាលសម្រាប់ក្រាលគេងចំនួន៦,០០០កំណាត់។ យ៉ាងណាមិញលោក Santos បានលើកឡើងថា បញ្ហាប្រឈមចម្បងនាពេលបច្ចុប្បន្នគឺបញ្ហាសុខភាពសាធារណៈ រួមមានកត្តាអនាម័យ និងការទប់ស្កាត់ជំងឺរីករាតត្បាតនៅក្នុងទីក្រុង។
គួរបញ្ជាក់ថាបើតាមទីភ្នាក់ងារឧតុនិយមជាតិកូឡុំប៊ី ខែមីនាកន្លងទៅនេះគឺជាខែដែលមានភ្លៀងធ្លាក់ច្រើនជោគជាំជាងគេបង្អស់នៅកូឡុំប៊ី គិតចាប់តាំងពីឆ្នាំ២០១១មក៕
