(វ៉ាស៊ីនតោន)៖ សេតវិមានអាមេរិកបានប្រកាសឲ្យដឹងថា ប្រធានាធិបតីលោក ដូណាល់ ត្រាំ បានធ្វើការ​ទំនាក់ទំនងតាមទូរស័ព្ទដោយផ្ទាល់ ទៅកាន់ប្រធានាធិបតីរុស្ស៊ីលោក វ្ល៉ាឌីមៀ ពូទីន ដើម្បី​ចូលរួមមរណទុក្ខ​ចំពោះជនរងគ្រោះទាំងអស់ និងថែមទាំងបង្ហាញការគាំទ្រពេញទំហឹងផងដែរ ចំពោះរុស្ស៊ីក្នុងឆ្លើយតបទៅ​នឹងអំពើភេរវកម្មដ៏អាក្រក់នេះ។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នៅមុននេះ​បន្តិច នាព្រឹកថ្ងៃអង្គារ ទី០៤ ខែមេសា ឆ្នាំ២០១៧។

គួរបញ្ជាក់ថាអាជ្ញាធររុស្ស៊ីកំពុងតាមប្រមាញ់ជនសង្ស័យម្នាក់ ដែលត្រូវបានថតជាប់ដោយកាមេរ៉ាសុវត្ថិភាព និង ត្រូវបានគេជឿជាក់ថា ជាអ្នកធ្វើសកម្មភាពវាយប្រហាដោយបំផ្ទុះគ្រាប់បែកស្លាប់មនុស្ស១១នាក់ និង របួស៤៥នាក់នៅឯស្ថានីយ៍រថភ្លើងក្រោមដី Sennaya Ploshchad ស្ថិតនៅក្នុងទីក្រុង St Petersburg កាលពីថ្ងៃចន្ទ។ ជនសង្ស័យរូបនេះ​គឺជាបុរសម្នាក់ មកពីប្រទេសតំបន់អាស៊ីកណ្ដាល និងមាន​អាយុខ្ទង់២០ឆ្នាំ។

យោងតាមទីភ្នាក់ងារ​សារព័ត៌មាន​រុស្ស៊ី Interfax និង Tass ជនសង្ស័យ​ខាងលើ ត្រូវបាន​ក្រុមអ្នក​ស៊ើបអង្កេត​កំណត់អត្តសញ្ញាណ​ហើយ ក៏ប៉ុន្តែ​ទន្ទឹមគ្នា ក៏មាន​សេចក្ដីរាយការណ៍​ផ្ទុយពីនេះ​ដែរថា បុរសម្នាក់នោះ​គឺជាជនបំផ្ទុះ​គ្រាប់បែក​អត្តឃាត។ ក្រុមអ្នកស៊ើប​អង្កេត​បានដាក់ការសង្ស័យថា​ ការវាយប្រហារដោយបំផ្ទុះ​គ្រាប់បែក កាលពីថ្ងៃចន្ទ​ជាសកម្មភាព​ភេរវកម្ម បើទោះជា​ពុំទាន់មានក្រុមណា​មួយចេញមុខ​អះអាងទទួលខុសត្រូវ​ក៏ដោយ។

ជាងនេះទៅទៀតសូម្បីតែ​នាយករដ្ឋមន្ត្រីរុស្ស៊ី លោក Dmitry Medvedev ក៏បានសរសេរ​នៅលើ Facebook របសលោកដែរថា ​ការវាយប្រហារដ៏អាក្រក់នេះ​គឺជាទង្វើភេរវកម្ម។ អាជ្ញាធរក្នុង​ទីក្រុង St Petersburg បានប្រកាស​ប្រកាន់ទុក្ខរយៈពេល​០៣ថ្ងៃ ខណៈមេដឹកនាំ​ពិភពលោកដូចជា​ប្រធានាធិបតីអាមេរិក លោក ដូណាល់ ត្រាំ បាននាំគ្នា​ថ្កោលទោស និងហៅការ​វាយប្រហារនេះជាទង្វើគួរឱ្យភ័យខ្លាច រីឯអធិការបតីអាល្លឺម៉ង់​លោកស្រី អេនជេឡា មឺគែល ចាត់ទុកថា​វាជាទង្វើសាហាវ​ព្រៃផ្សៃ។

ការវាយប្រហារបំផ្ទុះគ្រាប់បែក​នៅក្នុងទីក្រុង St Petersburg កើតមានឡើង​ចំពេល ចរន្តនៃការធ្វើបាតុកម្មតវ៉ាប្រឆាំង​នឹងអំពើពុក​រលួយក្នុងប្រទេស​រុស្ស៊ី កំពុងមាន​ការកើនឡើង​គួរឱ្យកត់​សម្គាល់។ ជាក់ស្ដែង​នាពេលថ្មីៗ​នេះ អាជ្ញាធររុស្ស៊ី​បានចាប់ខ្លួន​ក្រុមបារតុករ​ជិត ១,០០០នាក់ឯណោះ៕