(សេអ៊ូល)៖ សម្ព័ន្ធមិត្តទាំងបីកូរ៉េខាងត្បូង-ជប៉ុន-អាមេរិក បាននិងកំពុងធ្វើសមយុទ្ធយោធាជើងទឹករួមគ្នា មួយនៅថ្ងៃចន្ទនេះ ដើម្បីសំដៅទប់ទល់ការគំរាមកំហែងដោយគ្រាប់មីស៊ីល ពីសំណាក់នាវាមុជទឹក របស់កូរ៉េខាងជើង។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនាព្រឹកថ្ងៃចន្ទ ទី០៣ ខែមេសា ឆ្នាំ២០១៧។
ក្រសួងការពារជាតិកូរ៉េខាងត្បូងបានឲ្យដឹងថា សមយុទ្ធរយៈពេលបីថ្ងៃខាងលើនេះ បានចាប់ផ្តើមនៅសមុទ្រភាគខាងត្បូង នៃប្រទេសកូរ៉េខាងត្បូង ដែលស្ថិតនៅក្បែរប្រទេសជប៉ុន ហើយវាមានការចូលរួមពីសំណាក់ពលទាហានចំនួន៨០០នាក់ ព្រមទាំងនាវាពិឃាត និងឧទ្ធម្ភាគចក្រជាច្រើនគ្រឿងបំពាក់ដោយសព្វាវុធទំនើបៗសម្រាប់ប្រឆាំងនឹងនាវាមុជទឹក។ សមយុទ្ធយោធានេះ ត្រូវបានធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានព្រមានថា សហរដ្ឋអាមេរិក បានរៀបចំខ្លួនរួចជាស្រេចក្នុងការប្រើវិធានការជាឯកតោភាគី ដើម្បីចាត់ការទៅលើកម្មវិធីនុយក្លេអ៊ែររបស់ទីក្រុងព្យុងយ៉ាង ប្រសិនណាចិនបញ្ជាក់ថា ពុំមានឆន្ទៈជួយដោះស្រាយបញ្ហានេះទេនោះ។
គួរបញ្ជាក់ថាយោងតាមក្រសួងដដែលខាងលើ ការហ្វឹកហាត់សមត្ថភាពយោធាតាមផ្លូវទឹកលើកនេះ គឺដើម្បីធានាឲ្យបាននូវការឆ្លើយតបប្រកបដោយប្រសិទ្ធភាព ចំពោះការគំរាមកំហែងនានា ពីសំណាក់នាវាមុជទឹករបស់កូរ៉េខាងជើង រួមមានទាំងមីស៊ីលផ្លោងបាញ់ចេញពីក្នុងទឹក SLBM ហើយសមយុទ្ធនេះក៏ត្រូវបានធ្វើឡើងដើម្បីបង្ហាញ ពីការប្តេជ្ញាយ៉ាងមុតមាំរបស់ប្រទេសទាំងបីផងដែរ៕
