(ទីក្រុងឡុងដ៍)៖ មនុស្សសរុបចំនួន១២នាក់ ដែលត្រូវបានចាប់ខ្លួនជុំវិញករណីវាយប្រហារភេរវកម្មកាលពីថ្ងៃទី២២ ខែមីនាកន្លងទៅ នៅក្បែរសភានៃចក្រភពអង់គ្លេស និងបានបណ្តាលឲ្យមនុស្សប្រាំនាក់បាត់បង់ជីវិតនោះ នាពេលនេះត្រូវបានដោះលែងឲ្យមានសេរីភាពវិញហើយដោយពុំមានការប្តឹងផ្តល់ឬចោទប្រកាន់អ្វីទាំងអស់។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅយប់ថ្ងៃសៅរ៍ ទី០១ ខែមេសា ឆ្នាំ២០១៧។
ប៉ូលិសប្រចាំទីក្រុងឡុងដ៍បានឲ្យដឹងនៅក្នុងសេចក្តីថ្លែងការណ៍មួយថា «ជនទាំងឡាយដែលត្រូវបានចាប់ឃាត់ខ្លួន ដោយសង្ស័យថាអាចមានជាប់ពាក់ព័ន្ធក្នុងការរៀបគំរោងការណ៍ វាយប្រហារដោយអំពើភេរវកម្មនៅលើស្ពាន Westminter ដែលស្ថិតនៅចំកណ្តាលបេះដូងនៃទីក្រុងឡុងដ៍ កាលពីថ្ងៃពុធ ទី២២ ខែមីនាកន្លងទៅនោះ ឥឡូវនេះត្រូវបានដោះលែងឲ្យមានសេរីភាពជាធម្មតាវិញហើយ»។
គួរបញ្ជាក់ថាភេរវករឈ្មោះ Khalid Masood ដែលមានដើមកំណើតជាជនជាតិអង់គ្លេស បានបើករថយន្តក្នុងល្បឿនយ៉ាងលឿនឆ្លងកាត់ស្ពាន Westminister ដែលបានបណ្តាលឲ្យអ្នកថ្មើរជើងបីនាក់បាត់បង់ជីវិតភ្លាមៗនៅនឹងកន្លែង និងបានបង្ករបួសជាទម្ងន់ដល់មនុស្សជាច្រើននាក់បន្ថែមទៀត នៅមុនពេលដែលរូបខ្លួនរត់ចូលទៅក្នុងសភាអង់គ្លេសនិងបានចាក់សម្លាប់មន្រ្តីប៉ូលិសម្នាក់ ហើយភ្លាមៗក្រោយមកក៏ត្រូវបានក្រុមប៉ូលិសបាញ់សម្លាប់ចោលតែម្តងទៅ ខណៈជនរងគ្រោះម្នាក់ទៀតបានស្លាបក្នុងមន្ទីរពេទ្យ នៅប៉ុន្មានថ្ងៃក្រោយ។ ម៉្យាងវិញទៀតនៅអំឡុងពេលកើតហេតុនាយករដ្ឋមន្រ្តីអង់គ្លេសលោកស្រី Theresa May ក៏មានវត្តមាននៅក្នុងវិមានសភាផងដែរ៕
