(ហ្សាការតា)៖ មនុស្សចំនួន៣៨នាក់កំពុងជាប់នៅក្រោមគំនរដីល្បាប់ ដែលបានបាក់ស្រុតនៅខេត្ត East Java ភាគខាងលិចប្រទេសឥណ្ឌូណេស៊ីបង្កឡើងដោយភ្លៀងធ្លាក់ខ្លាំង ហើយព្រមពេលជាមួយគ្នា អាជ្ញាធរប្រចាំតំបន់ ក៏បានចេញប្រតិបត្តិការជួយសង្រ្គោះជាបន្ទាន់ផងដែរ។ នេះបើតាមសម្តីរបស់មេបញ្ជាការ យោធាក្នុងតំបន់កើតហេតុ ដែលត្រូវបានដកស្រង់ដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃសៅរ៍ ទី០១ ខែមេសា ឆ្នាំ២០១៧។
ដោយឡែកអ្នកនាំពាក្យទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី លោក Sutopo Purwo Nugroho បានឲ្យដឹងថា ហេតុការណ៍រអិលបាក់ដីខាងលើ ដែលបង្កឡើងដោយសារតែមានភ្លៀងធ្លាក់យ៉ាងខ្លាំងក្លានោះ បានកើតឡើងនៅជើងភ្នំមួយក្នុងភូមិ Banaran នៃស្រុក Ponorogo និងបានបំផ្លិចបំផ្លាញផ្ទះសម្បែងប្រជាពលរដ្ឋចន្លោះពី ២៥ទៅ៣០ខ្នង។
គួរបញ្ជាក់ថានាពេលនេះពលទាហាន កងកម្លាំងប៉ូលិស និងបុគ្គលិកមកពីការិយាល័យគ្រប់គ្រងគ្រោះមហន្តរាយធម្មជាតិក្នុងតំបន់ រួមទាំងក្រុមអ្នកស្ម័គ្រចិត្តកំពុងធ្វើការយ៉ាងសស្រាក់សស្រាំ ដើម្បីតាមស្វែងរក និងជួយសង្រ្គោះជនរងគ្រោះ ខណៈផ្លូវចេញចូលតំបន់កើតហេតុដ៏សែនលំបាក បានបង្កភាពរាំងស្ទះដល់ប្រតិបត្តិការនេះ៕
