(ពិភពលោក)៖ រឿងរ៉ាវក៏ដូចជាព្រឹត្តិការណ៍សំខាន់ៗជាច្រើន បានកើតឡើងនៅជុំវិញពិភពលោកនាថ្ងៃទី៣១ ខែមីនា ឆ្នាំ២០១៧នេះ ដោយខាងក្រោមគឺជាកម្រងរូបភាពនៃព្រឹត្តការណ៍អន្តរជាតិពិសេសៗសម្រាប់ថ្ងៃសុក្រនេះ៖
១៖ អតីតប្រធានាធិបតីកូរ៉េខាងត្បូងលោកស្រី ផាក គឺនហេ ត្រូវបានបញ្ជូនទៅកាន់មន្ទីរឃុំឃាំងក្នុងទីក្រុងសេអ៊ូល បន្ទាប់ពីតុលាការបានសម្រេចចេញដីកាចាប់ខ្លួន។
២៖ ជនជាតិម៉ាឡេស៊ីទាំង០៩នាក់ដែលត្រូវបានកូរ៉េខាងជើងអនុញ្ញាតឲ្យវិលត្រឡប់ទៅមាតុភូមិវិញ បានធ្វើដំណើរទៅដល់អាកាសយានដ្ឋាននៃរដ្ឋធានីគូឡាឡាំពួនៅថ្ងៃសុក្រនេះ បន្ទាប់ពីរដ្ឋាភិបាលនៃភាគីទាំងសងខាងបានធ្វើការចរចារគ្នា ហូតឈានដល់កិច្ចព្រមព្រៀងដោយសន្តិវិធី។
៣៖ នៅក្រោយការចរចាគ្នារវាងរដ្ឋាភិបាលទីក្រុងគូឡាឡាំពួរនិងទីក្រុងព្យុងយ៉ាង ជនជាតិកូរ៉េខាងជើងចំនួនបីនាក់ ដែលជាជនសង្ស័យក្នុងករណីឃាតកម្មទៅលើបងប្រុសម្តាយទីទៃរបស់លោក គីម ជុងអ៊ុន ក៏ត្រូវបានអនុញ្ញាតឲ្យចាកចេញពីប្រទេសម៉ាឡេស៊ី រួមជាមួយសាកសពលោក គីម ជុងណាំ ដើម្បីទៅកាន់ប្រទេសកំណើតវិញដោយឆ្លងកាត់ទីក្រុងប៉េកាំងផងដែរ។
៤៖ ត្រីឆ្លាមមួយក្បាលមានប្រវែង១.៥ម៉ែត្រ បានបោកបក់ពីសមុទ្រដោយមកតាមទឹកជំនន់ដែលបង្កឡើងដោយព្យុះស៊ីក្លូន Debbie ជាហេតុបានបណ្តាលឲ្យអាជ្ញាធរអូស្ត្រាលី ចេញសេចក្ដីព្រមានជាបន្ទាន់ដល់ប្រជាជនរបស់ខ្លួន ដែលរស់នៅក្នុងតំបន់រងគ្រោះដោយសារទឹកជំនន់ ត្រូវមានការប្រុងប្រយ័ត្នខ្ពស់ និងមិនត្រូវចុះក្នុងទឹកជាដាច់ខាត។
៥៖ ក្រុមហ៊ុនអវកាស SpaceX របស់សហរដ្ឋអាមេរិកនៅថ្ងៃសុក្រនេះបានបង្កើតព្រឹត្តិការណ៍ប្រវត្តិសាស្រ្តមួយ បន្ទាប់ពីបានធ្វើការបង្ហោះគ្រាប់រ៉ុក្កែត Flacon 9 ដែលធ្លាប់ប្រើប្រាស់ម្តងរួចមកហើយនោះ ដើម្បីនាំយកផ្កាយរណបទៅកាន់លំហអាកាសសាជាថ្មី ហើយបានវាបានត្រឡប់មកឲ្យធ្វើការចុះចតនៅលើ Droneship ដែលឈរជើងក្នុងមហាសមុទ្រអាត្លង់ទិចបានដោយជោគជ័យ។
៦៖ ក្រុមកប៉ាល់នេសាទត្រីបាឡែននៃប្រទេសជប៉ុននៅថ្ងៃសុក្រនេះ បានវិលត្រឡប់មកពីការតាមប្រមាញ់ អស់រយៈពេលជាច្រើនខែនៅឯទ្វីបអង់តាកទិក ក្រោមស្លាកឈ្មោះនៃការសិក្សាស្រាវជ្រាវផ្នែកវិទ្យាសាស្រ្ត ជាមួយសត្វត្រីខ្នាតធំនេះមិនតិចជាង៣០០ក្បាលនោះឡើយ ដែលបាននិងកំពុងប្រឈមមុខការរិះគន់យ៉ាងចាស់ដៃពីសំណាក់អន្តរជាតិ។
៧៖ អគ្គលេខាធិការនៃអង្គការ NATO លោក Jens Stoltenberg ចូលរួមកិច្ចប្រជុំថ្នាក់រដ្ឋមន្រ្តីការបរទេសរបស់ NATO នៅឯទីស្នាក់ការក្នុងទីក្រុងព្រុចសែលនៃប្រទេសប៊ែលហ្សិក៕
