(ហូជីមិញ)៖ នាវាដឹកទំនិញមួយគ្រឿងបានលិចនៅក្នុងដែនសមុទ្រភាគខាងត្បូងប្រទេសវៀតណាម ស្ថិតនៅក្បែរឆ្នេរសមុទ្រទីក្រុង Vung Tau នៃខេត្ត Ba Ria-Vung Tau ដែលនាំឲ្យកម្មករ​នាវានោះចំនួន ០៩នាក់បាត់ខ្លួន​រហូតមកដល់ព្រឹក​ថ្ងៃពុធនេះ។ នេះបើតាមការ​ចេញផ្សាយដោយទីភ្នាក់ងារព័ត៌មានចិន ស៊ិនហួរ នារសៀលថ្ងៃពុធ ទី២៩ ខែមីនា ឆ្នាំ២០១៧។

នាវាដឹកទំនិញខាងលើនេះ​មានទម្ងន់ ៣,០០០តោនមាន​ឈ្មោះថា Hai Thanh 26 បានលិច​បន្ទាប់ពីបាន​បុកនាវាដឹកទំនិញ​មួយគ្រឿងទៀត ស្ថិតនៅចម្ងាយជិត ៦០គីឡូម៉ែត្រពីឆ្នេរសមុទ្រទីក្រុងខាងលើ។ នៅក្នុងហេតុការណ៍​នោះ​មានកម្មករតែពីរ​នាក់ប៉ុណ្ណោះដែលត្រូវបានជួយសង្គ្រោះ ខណៈមនុស្ស០៩នាក់ ផ្សេងទៀត​អាជ្ញាធរ​ការពារដែនសមុទ្រ​វៀតណាមកំពុងតែ​បន្តការស្វែងរកនៅឡើយ។

គួរបញ្ជាក់ថា​នាវាដឹកទំនិញខាងលើនេះ​មានទិសដៅពី​ទីក្រុង Hai Phong ទៅកាន់ទីក្រុង Can Tho ភាគខាងត្បូងប្រទេស​វៀតណាម៕