(មូស្គូ)៖ ប៉ូលិសរុស្ស៊ីបានឱ្យដឹងថា ពួកគេបានឃាត់ខ្លួនក្រុមបាតុករជិត ៦០០នាក់ ក្នុងនោះរួមមានទាំងអ្នកនយោបាយប្រឆាំងរដ្ឋាភិបាលរបស់ លោក វ្ល៉ាឌីមៀ ពូទីន គឺលោក Aleksey Navalny នៅអំឡុងដែលមនុស្សប្រមាណ ៨,០០០នាក់បានចូលរួមធ្វើបាតុកម្មតវ៉ាប្រឆាំងនឹងអំពើពុករលួយ នៅកណ្ដាលទីក្រុងម៉ូស្គូ កាលពីថ្ងៃអាទិត្យ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃចន្ទ ទី២៧ ខែមីនា ឆ្នាំ២០១៧។
យោងតាមប៉ូលិសរុស្ស៊ីការធ្វើបាតុកម្មតវ៉ាងខាងលើ ធ្វើឡើងដោយគ្មានការអនុញ្ញាត ហើយក្នុងពេលជាមួយគ្នាអាជ្ញាធរបានប្រាប់ឱ្យពួកគេបំបែកជួរគ្នា ក៏ប៉ុន្តែ ក្រុមបាតុករទំាងនេះមិនព្រមស្ដាប់នោះទេ។ ក៏ប៉ុន្តែក្រុមអង្គការសង្គមស៊ីវិលបញ្ជាក់ថា ការធ្វើបាតុកម្មដោយសន្តិវិធីនេះគ្មានអ្វីខុសច្បាប់ឡើយ មិនតែប៉ុណ្ណោះពួកគេក៏បានអះអាងដែរថា បាតុករយ៉ាងហោចណាស់ ៧០០នាក់ត្រូវបានចាប់ខ្លួនរីឯលោក Aleksey Navalny កំពុងជាប់ឃុំខ្លួនជាបណ្ដោះអាសន្ន។
គួរបញ្ជាក់ថាបើតាមក្រុមការងាររបស់ លោក Aleksey Navalny លោកនឹងត្រូវបង្ហាញខ្លួននៅចំពោះមុខតុលាការរុស្ស៊ីនៅថ្ងៃចន្ទនេះ ពីបទរំលោភលើច្បាប់រដ្ឋបាលនិយ័តកម្មសាធារណៈ ដែលអាចនឹងប្រឈមមុខជាប់ឃុំជាអតិបរាមា១៥ថ្ងៃ និងធ្វើការងារជាប្រយោជន៍សហគមន៍ ១០០ ម៉ោង ព្រមទាំងត្រូវពិន័យជាប្រាក់ ៣៥១ដុល្លារនៅក្នុងករណីតុលាការរកឃើញថា លោកបានប្រព្រឹត្តដូចការចោទប្រកាន់មែននោះ៕
