(ហុងកុង)៖ ដូចការគ្រោងទុក នៅទីបំផុតលោកស្រី Carrie Lam ដែលជាអតីតថ្នាក់ដឹកនាំជាន់ខ្ពស់ទីក្រុងហុងកុង និងជាជំរើស​របស់ទីក្រុងប៉េកាំង ត្រូវបាន ជ្រើសរើសជាប្រធានប្រតិបត្តិថ្មី ទីក្រុងហុងកុង ដោយគណៈកម្មាធិការ​បោះឆ្នោតមាន​សមាជិក១២០០នាក់ ដែលភាគច្រើនសុទ្ធសឹងតែជាអ្នកស្មោះស្មាក់នឹង រដ្ឋាភិបាលទីក្រុងប៉េកាំង។ នេះបើតាមការចេញផ្សាយមុននេះបន្តិចដោយសារព័ត៌មាន Channel News Asia ​នៅថ្ងៃអាទិត្យ ទី២៦ ខែមីនា ឆ្នាំ២០១៧។

គណៈកម្មាធិការបោះឆ្នោតទីក្រុងហុងកុង បានជ្រើសរើសលោកស្រី Carrie Lam នៅក្នុងចំណោមបេក្ខជន០២នាក់ ផ្សេងទៀតរួមមាន លោក John Tsang និងលោក Woo Kwok-hing សម្រាប់ជំនួសតំណែងមេដឹកនាំបច្ចុប្បន្ន លោក CY Leung ដែលបានប្រកាសលាលែងពីតំណែង កាលពីខែកក្កដា ឆ្នាំ២០១៦ ដោយសារហេតុផ្ទាល់ខ្លួន។ ក៏ប៉ុន្តែទន្ទឹមគ្នានោះដែរ ក្រុមបាតុករជាច្រើននាក់ បានរុញច្រានជាមួយអាជ្ញាធរប៉ូលិស នៅខាងក្រៅអាគារ Hong Kong Convention and Exhibition Centre ជាទីដែលការបោះឆ្នោតបានប្រពឹត្តទៅ។

ម្យ៉ាងវិញទៀត ក្រុមបាតុករទាំងនេះក៏បានចោទប្រកាន់ដែរថារដ្ឋាភិបាលចិន បានលូកដៃចូលក្នុងកិច្ចបោះឆ្នោត តាមរយៈការ​ប្រើប្រាស់​ឥទ្ធិពលរបស់ខ្លួនបង្ខំឱ្យអ្នកបោះឆ្នោត គាំទ្រលោកស្រី Carrie Lam ជាជាងអតីតប្រធានហិរញ្ញវត្ថុ លោក John Tsang ធ្វើជាមេដឹកនាំថ្មីរបស់ទីក្រុងហុងកុង។

គួរបញ្ជាក់ថា បើតាមកាសែតចិន People's Daily​ លោកស្រី Carrie Lam ​បានទទួលការគាំទ្រច្រើនជាង ៦០០សំឡេង ខណៈដើម្បីក្លាយជាមេដឹកនាំទីក្រុង ហុងកុង បេក្ខជនត្រូវការសំឡេងឆ្នោត ៦០១សំឡេង៕