(ព្យុងយ៉ាង)៖ អ្នកតំណាងអចិន្រ្តៃយ៍នៃប្រទេសកូរ៉េខាងជើងប្រចាំនៅអង្គការសហប្រជាជាតិ (UN) បានផ្ញើលិខិតមួយច្បាប់ទៅកាន់អគ្គលេខាធិការ UN ពាក់ព័ន្ធស្ថានការណ៍ដ៏ក្តៅគគុកនៅឧបទ្វីបកូរ៉េ ដោយបានបន្ទោសថា សហរដ្ឋអាមេរិកនិងប្រទេសកូរ៉េខាងត្បូង គឺជាអ្នកដុតរោលភាពតានតឹងនៅទីនោះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃសុក្រ ទី២៤ ខែមីនា ឆ្នាំ២០១៧។
យោងតាមសេចក្តីរាយការណ៍ របស់ទីភ្នាក់ងារព័ត៌មានរដ្ឋកូរ៉េខាងជើង KCNA អ្នកតំណាងអចិន្រ្តៃយ៍របស់រដ្ឋាភិបាលទីក្រុងព្យុងយ៉ាងប្រចាំនៅ UN បានថ្លែងនៅក្នុងលិខិតនោះថា ឧបទ្វីបកូរ៉េកំពុងស្ថិតនៅលើមាត់ជ្រោះនៃភ្លើងសង្រ្គាមហើយ ដោយសារតែការធ្វើសមយុទ្ធយោធារួមគ្នាទ្រង់ទ្រាយធំបំផុតមិនធ្លាប់មាន ដែលកំពុងបន្តប្រារព្ធឡើងដោយទីក្រុងវ៉ាស៊ីនតោន និងទីក្រុងសេអ៊ូល។
ព្រមពេលជាមួយគ្នាអ្នកតំណាងរូបនោះក៏បានរំលឹកដែរថា កាលពីថ្ងៃទី០៦ ខែមីនា កូរ៉េខាងជើងបានទទូចឲ្យក្រុមប្រឹក្សាសន្តិសុខនៃអង្គការសហប្រជាជាតិបើកកិច្ចប្រជុំជាបន្ទាន់មួយ ដើម្បីពិភាក្សាពីបញ្ហានៃការធ្វើសមយុទ្ធរួមអាមេរិក-កូរ៉េខាងត្បូង ប៉ុន្តែមកទល់ពេលនេះពុំទាន់ទទួលបានការឆ្លើយតបវិញនោះឡើយ។
គួរបញ្ជាក់ថាមន្រ្តីកូរ៉េខាងជើងដដែលនេះ ការធ្វើតេស្តមីស៊ីលផ្លោងក៏ដូចជាអាវុធនុយក្លេអ៊ែរ ដែលកំពុងត្រូវបានអនុវត្តន៍ជាបន្តបន្ទាប់ដើម្បីពង្រឹងកម្លាំងយោធាជាតិនៅលើដីគោក លើទឹក និងលើអាកាស គឺជាវិធានការការពារខ្លួនតែប៉ុណ្ណោះ ដើម្បីការពារដែនអធិបតេយ្យភាពនៃប្រទេសកូរ៉េខាងជើង ពីការគំរាមកំហែងដោយនុយក្លេអ៊ែរឥតឈប់ឈររបស់សហរដ្ឋអាមេរិក៕
