(ម៉ូស្គូ)៖ ក្រសួងការបរទេសរុស្ស៊ីបានកោះហៅអគ្គរដ្ឋទូតអ៊ីស្រាអែលប្រចាំទីក្រុងម៉ូស្គូ ឱ្យមកបំភ្លឺក៏ដូចជាសម្ដែងការតវ៉ាជំទាស់ទៅនឹងការវាយប្រហារតាមផ្លូវ អាកាសពីសំណាក់យន្ដហោះចម្បាំងអ៊ីស្រាអែល ទៅលើតំបន់ក្បែរទីក្រុង Palmyra ក្នុងប្រទេសស៊ីរី។ នេះបើតាមទីភ្នាក់ងារសារព័ត៌មាន Interfax ដកស្រង់ដោយសារព័ត៌មាន Channel News Asia នៅរសៀលថ្ងៃចន្ទ ទី២០ ខែមីនា ឆ្នាំ២០១៧។
យោងតាមទីភ្នាក់ងារសារព័ត៌មាន Interfax តាមរយៈការស្រង់ពាក្យសម្ដីពីក្រុមមន្ត្រីក្រសួងការបរទេសរុស្ស៊ី អគ្គរដ្ឋទូតអ៊ីស្រាអែល លោក Gary Koren ត្រូវបានកោះហៅមកក្រសួងកាលកាលពីថ្ងៃសុក្រសប្ដាហ៍មុន។
គួរបញ្ជាក់ថាកាលពីសប្ដាហ៍មុនយោធាស៊ីរីបាននិយាយថា យន្ដហោះចម្បាំងអ៊ីស្រាអែលជាច្រើនគ្រឿង បានហោះចូលក្នុងដែនអាកាសស៊ីរី និងបានបើកការវាយប្រហារតាមផ្លូវអាកាសទៅលើតំបន់ក្បែរទីក្រុង Palmyra ហើយដែលទង្វើនេះត្រូវបានភាគីស៊ីរីអះអាងថា គឺជាសកម្មភាពឈ្លានពានជួយដល់ក្រុម ISIS៕
