(អង់ការ៉ា)៖ ប្រធានាធិបតី​តួកគីលោក តាយយីប អ៊ឺដូហ្គាន់ បានចោទ​ប្រកាន់អធិការបតី​អាល្លឺម៉ង់ លោកស្រី អាន់ជែឡា មឺគែល ថាជា​អ្នកគាំទ្រ​ក្រុមភេរវករ នៅក្នុងបរិបទ​ដែលតួកគី​ខ្លួនឯងផ្ទាល់​កំពុងមាន​ជម្លោះការទូត​ជាមួយ​អាល្លឺម៉ង់ និងហូឡង់​ជុំវិញការ​រារាំងការ​ជួបជុំ​របស់ក្រុមអ្នក​គាំទ្រ​លោក តាយយីប អ៊ឺដូហ្គាន់ សម្រាប់យុទ្ធនាការ​ឃោសនាបោះឆ្នោត​ប្រជាមតិស្ដីពី​ការធ្វើវិសោ​ធនកម្មរដ្ឋម្មនុញ្ញ​នៅថ្ងៃទី១៦ ខែមេសា​ខាងមុខនេះ។ នេះបើតាម​ការចេញផ្សាយ​ដោយ​សារព័ត៌មាន Russian Today នៅរសៀលថ្ងៃអង្គារ ទី១៤ ខែមីនា ឆ្នាំ២០១៧។

ថ្លែងនៅក្នុង​បទសម្ភាសន៍​តាមកញ្ចក់​ទូរទស្សន៍ លោក អឺដូហ្កាន់ បានលើកឡើង​យ៉ាងដូច្នេះថា «លោកស្រី មឺគែល! ហេតុអ្វីបាន​ជាអ្នកលាក់បាំង ក្រុមភេរវករ​នៅក្នុងប្រទេស​របស់អ្នក? ហេតុអ្វីបាន​ជាអ្នក​មិនព្រមធ្វើ​សកម្មភាពសោះ? លោកស្រី មឺគែល! អ្នកជាអ្នកគាំទ្រ​ក្រុមភេរវករ»។ លោក តាយយីប អ៊ឺដូហ្គាន់ ក៏បាន​រិះគន់​លោកស្រី មឺគែល ផងដែរ​ចំពោះការបង្ហាញ​ការគាំទ្រ​របស់​លោកស្រី ដល់នាយករដ្ឋ​មន្ត្រីហូឡង់ នៅ​ក្នុង​វិបត្តិការ​ទូតរវាង​ហូឡង់ និងតួកគី»។ ទោះបីជា​យ៉ាងណា លោកស្រី មឺគែល បានចាត់ទុក​ការចោទ​ប្រកាន់​​នេះ ជារឿងគួរឱ្យ​ស្អប់មិនអាច​ទទួលយក​បាន ហើយថា​គ្មានបំណង​ចូលរួមនៅ​ក្នុងជម្លោះ​នេះឡើយ។

គួរបញ្ជាក់ថាលោក តាយយីប អ៊ឺដូហ្គាន់ ធ្លាប់បាន​ប្រៀបធៀប​អាល្លឺម៉ង់​ទៅនឹង​សម័យ​ណាហ្ស៊ីស​ហ៊ីត្លែរ បន្ទាប់ពីអាជ្ញា​ធរអាល្លឺម៉ង់ រារាំងមិនឱ្យ​ក្រុមអ្នកគាំទ្រ​ប្រធានាធិបតីតួកគី​រូបនេះ ជួបជុំគ្នា កាលពី​សប្ដាហ៍មុន៕