(ម៉ូស្គូ)៖ រដ្ឋាភិបាលទីក្រុងម៉ូស្គូបានស្នើយ៉ាងទទូច ឲ្យស្ថាប័នស៊ើបការណ៍សម្ងាត់របស់សហរដ្ឋអាមេរិក ផ្តល់ការឆ្លើយតបយ៉ាងលម្អិតជាចំហ ចំពោះការចោទប្រកាន់របស់គេហទំព័រ WikiLeaks ពាក់ព័ន្ធនឹងសកម្មភាព Hack ផ្សេងៗរបស់ទីភ្នាក់ងារ CIA ដោយសារតែឯកសារសម្ងាត់ក្រោមលេខកូដ Vault 7 ដែលត្រូវបានបែកធ្លាយនោះ អាចបង្កជាការគំរាមកំហែងធ្ងន់ធ្ងរដល់សន្តិសុខអន្តរជាតិទាំងមូល។ នេះបើតាមការចេញផ្សាយដោយសារព័ត៌មានរុស្ស៊ី Russia Today (RT) នៅរសៀលថ្ងៃសៅរ៍ ទី១១ ខែមីនា ឆ្នាំ២០១៧។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានថ្លែងថា៖ «យើងពិតជាចង់ឲ្យស្ថាប័នស៊ើបការណ៍សន្តិសុខនៅទីក្រុងវ៉ាស៊ីនតោន ធ្វើការឆ្លើយតបយ៉ាងពេញលេញ និងដោយបើកចំហ ចំពោះឯកសារសម្ងាត់ដែលត្រូវបានចែកចាយ ជាមួយអង្គហេតុជាក់លាក់ ហើយបើសិនជាព័ត៌មាននេះត្រូវបញ្ជាក់ថា ជាការពិតមែននោះ វានឹងបង្កការគំរាមកំហែងយ៉ាងធំសម្បើម ដល់សន្តិសុខអន្តរជាតិក៏ដូចជាពិភពលោកយើងទាំងមូល»។
ផ្អែកលើឯកសារសម្ងាត់ CIA ដែលត្រូវបានទម្លាយដោយគេហទំព័រ Wikileaks ទីភ្នាក់ងារស៊ើបការសម្ងាត់អាមេរិក CIA អាចមានលទ្ធភាព Hack និងប្រមូលសារឆ្លើយឆ្លង ឬ Messages នៅលើ WhatsApp និងកម្មវិធីទូរស័ព្ទដៃជាច្រើនផ្សេងទៀតត្បិត CIA បានតាមដានក៏ដូចជាកំពុងគ្រប់គ្រងទូរស័ព្ទដៃស្មាតដល់ទៅ ៨៥ភាគរយ នៅទូទំាងពិភពលោក។ ជាងនេះទៅទៀត CIA ក៏បានផលិតវីរុសព្រមទំាងកម្មវិធីរាប់ពាន់ ដែលអនុញ្ញាតឱ្យខ្លួនចូល Hack ប្រមូលសារឆ្លើយឆ្លងនៅលើកម្មវិធី WhatsApp, Weibo របស់ចិន និង Clockman ចំណែកឯកសារជាអក្សរ ឬជាសំឡេងក៏ត្រូវបាន CIA Hack ផងដែរ។
តាមឯកសារសម្ងាត់របស់ WikiLeaks បានឲ្យដឹងថា CIA បានបង្កើតកម្មវិធីរាប់ពាន់ក្នុងនោះរួមមានទំាងការបង្កើតវីរុស និងកម្មវិធីជាច្រើនផ្សេងទៀត ដែលអនុញ្ញាតឱ្យខ្លួនចូល Hack ទិន្នន័យ ឬគ្រប់គ្រងឧបករណ៍អេឡិចត្រូនិច ដូចជាទូរស័ព្ទដៃស្មាតហ្វូន កុំព្យូរទ័រ ទូរទស្សន៍ និងរថយន្ដទំនើបជាដើម ដើម្បីឆ្លបយកការណ៍លើអ្នកប្រើប្រាស់។ ចំណែកឯក្រុមហ៊ុន Microsoft Apple និង Samsung ក៏បានបង្ហាញការព្រួយបារម្ភរបស់ខ្លួនផងដែរ បន្ទាប់ពីការបែកធ្លាយឯកសារសម្ងាត់ CIA។
គួរបញ្ជាក់ថា WikiLeaks បានបញ្ចេញឯកសារជុំដំបូងនៃ Vault 7 ដែលបកអាក្រាតអំពីសមត្ថភាពនៃការ Hack របស់ទីភ្នាក់ងារស៊ើបការណ៍សម្ងាត់ CIA របស់អាមេរិក ហើយយោងតាមក្រុមបញ្ចេញឯកសារសម្ងាត់ដ៏រសើបៗជុំវិញពិភពលោកដដែលនេះ ចង្កោមឯកសារដែលមានចំនួន៨,៧៦១ច្បាប់នេះ គឺត្រឹមតែមួយភាគរយប៉ុណ្ណោះនៃឯកសារសម្ងាត់ទាំងស្រុង ដែលគ្រោងនឹងចេញផ្សាយជាបន្តបន្ទាប់ទៀត៕
