(វ៉ាស៊ីនតោន)៖ លោក ដូណាល់ ត្រាំ នឹងអញ្ជើញមេដឹកនាំប៉ាឡេស្ទីនលោក ម៉ាមូដ អាប្បាស់ (Mahmud Abbas) មកកាន់សេតវិមាននាពេលឆាប់ៗខាងមុខនេះ នៅក្រោយកិច្ចសន្ទនាតាមទូរស័ព្ទលើកទីមួយរវាងមេដឹកនាំទាំងពីររូប ចាប់តាំងពីលោកប្រធានាធិបតីអាមេរិក បានស្បថឡើងកាន់តំណែងជាផ្លូវការកាលពីខែមករាកន្លងទៅ។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនាព្រឹកថ្ងៃសៅរ៍ ទី១១ ខែមីនា ឆ្នាំ២០១៧។
អ្នកនាំពាក្យរបស់ប្រធានាធិបតីប៉ាឡេស្ទីនបានឲ្យដឹងថា លោក ដូណាល់ ត្រាំ បានអញ្ជើញលោក អាប្បាស់ ទៅកាន់សេតវិមាននាពេលឆាប់ៗ ដើម្បីពិភាក្សាអំពីមធ្យោបាយក្នុងការបន្តនីតិវិធីនយោបាយប៉ាឡេស្ទីន-អ៊ីស្រាអែលវិញ។ លោក Nabil Abu Rudeina ដែលជាអ្នកនាំពាក្យបានបន្តទៀតថាលោក ត្រាំ បានបញ្ជាក់ពីការប្តេជ្ញាយ៉ាងមុតមាំរបស់លោក ចំពោះដំណើរការសន្តិភាពមួយដែលនឹងឈានទៅរកសន្តិភាពពិតប្រាកដមួយរវាងជនជាតិប៉ាឡេស្ទីន និងអ៊ីស្រាអែល។ យោងតាមប្រភពដដែលលោក អាប្បាស់ បានប្រាប់លោក ត្រាំ ថាសន្តិភាពគឺជាជម្រើសយុទ្ធសាស្រ្តមួយ សម្រាប់ប្រជាជនប៉ាឡេស្ទីន ដែលគួរតែនាំទៅរកការបង្កើតរដ្ឋប៉ាឡេស្ទីននៅក្បែរអ៊ីស្រាអែល។
នៅក្នុងរដ្ឋធានីវ៉ាស៊ីនតោនវិញ អ្នកនាំពាក្យសេតវិមានបានថ្លែងថាលោក ដូណាល់ ត្រាំ បានសង្កត់ធ្ងន់អំពីជំនឿជឿជាក់ផ្ទាល់ខ្លួនរបស់លោកថា សន្តិភាពអាចសម្រេចបាន រីឯពេលវេលាក៏បានមកដល់ផងដែរសម្រាប់ធ្វើការចរចាគ្នា។ លោក សន ស៉្ពៃសឺ (Sean Spicer) បាននិយាយថា «លោកប្រធានាធិបតីបានគូសបញ្ជាក់ថា សហរដ្ឋអាមេរិកមិនអាចដាក់ចេញនូវដំណោះស្រាយមួយ ទៅលើអ៊ីស្រាអែល និងប៉ាឡេស្ទីនបានឡើយ ហើយភាគីម្ខាងក៏ពុំអាចដាក់បង្ខំកិច្ចព្រមព្រៀងមួយទៅកាន់ភាគីម្ខាងទៀតបានផងដែរ ហើយប្រធានាធិបតីលោក ដូណាល់ ត្រាំ បានអញ្ជើញប្រធានាធិបតីលោក អាប្បាស់ មកជួបពិភាក្សាគ្នានៅឯសេតវិមាននាពេលឆាប់ៗខាងមុខនេះ»។
គួរបញ្ជាក់ថាកាលពីពាក់កណ្តាលខែកុម្ភៈកន្លងទៅនេះ លោក ដូណាល់ ត្រាំ បានទទួលស្វាគមន៍នាយករដ្ឋមន្រ្តីអ៊ីស្រាអែលលោក ប៊ិនចាមីន នេតាន់យ៉ាហូ (Benjamin Netanyahu) នៅឯសេតវិមាន ដែលនៅក្នុងជំនួបកាលនោះ លោក ត្រាំ បានបំបែកគោលនយោបាយរាប់ទសវត្សរ៍របស់សហរដ្ឋអាមេរិក ដោយការលើកឡើងថារូបលោកមិនចាំបាច់ត្រូវប្រើប្រាស់ «ដំណោះស្រាយរដ្ឋពីរ» ដើម្បីបញ្ចប់ជម្លោះអ៊ីស្រាអែល-ប៉ាឡេស្ទីននោះឡើយ។ ដោយឡែកដំណើរការសន្តិភាពស្តីពីបញ្ហានេះ បានជាប់គាំងចាប់តាំងពីខែមេសា ឆ្នាំ២០១៤មកម៉្លេះ បន្ទាប់ពីការបរាជ័យនៃកិច្ចចរចាដោយប្រយោល ដឹកនាំដោយអតីតរដ្ឋមន្រ្តីការបរទេសអាមេរិកលោក ចន ឃើរី៕
