(ម៉ូស្គូ)៖ ប្រធានាធិបតីរុស្ស៊ីលោក វ៉្លាឌីមៀ ពូទីន និងប្រធានាធិបតីតួកគីលោក តាយយីប អឺដូហ្គាន់ (Recep Tayyip Erdogan) បានថ្លែងកោតសរសើរ និងស្ញប់ស្ញែងចំពោះចំណងទ្វេភាគី ដែលបានវិលទៅរកភាពប្រសើរឡើងរវាងប្រទេសទាំងពីរ ស្របពេលដែលប្រមុខរដ្ឋាភិបាលទាំងពីរបានសន្យាថា នឹងបន្តសហការគ្នាយ៉ាងពេញទំហឹង ដើម្បីបញ្ចប់សង្រ្គាមដ៏រ៉ាំរ៉ៃនៅក្នុងប្រទេសស៊ីរី។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃសៅរ៍ ទី១១ ខែមីនា ឆ្នាំ២០១៧។
មេដឹកនាំទាំងពីរបានជួបសំណេះសំណាលគ្នានៅវិមានក្រឹមឡាំង ដើម្បីធ្វើការពិភាក្សាអំពីចំណុចយុទ្ធសាស្រ្តជាច្រើន នៃការអភិវឌ្ឍនូវទំនាក់ទំនងទ្វេភាគីរុស្ស៊ី-តួកគី ក៏ដូចជាកិច្ចសហប្រតិបត្តិការដើម្បីដោះស្រាយបញ្ហានានាក្នុងតំបន់ និងទូទាំងសកលលោក ជាពិសេសជម្លោះនៅប្រទេសស៊ីរី និងអ៊ីរ៉ាក់។
នៅក្នុងជំនួបខាងលើលោក ពូទីន បានលើកឡើងថា «បទឈប់បាញ់នៅស៊ីរីកំពុងប្រព្រឹត្តិទៅជាធម្មតា ដោយសារតែកិច្ចខិតខំប្រឹងប្រែងយ៉ាងសស្រាកសស្រាំរបស់រុស្ស៊ីតួកគី និងអ៊ីរ៉ង់។ ម៉្យាងវិញទៀត យើងបានព្រមព្រៀងគ្នាជាមួយភាគីតួកគីថា នឹងបន្តកិច្ចសហប្រតិបត្តិរបស់ពួកយើង ក្នុងការប្រយុទ្ធប្រឆាំងនឹងក្រុមភេរវករ ជាពិសេសគឺក្រុម ISIS ក៏ដូចជាការធ្វើការជាមួយគ្នាតាមរយៈយោធា និងទីភ្នាក់ងារពិសេសផងដែរ»។
គួរបញ្ជាក់ថាកិច្ចសហប្រតិបត្តិការស្តីពីបញ្ហានៅស៊ីរី រវាងប្រទេសរុស្ស៊ី និងតួកគី បានគូសចំណាំនូវការប្រែប្រួលគួរឲ្យកត់សម្គាល់មួយ សម្រាប់ប្រជាជាតិទាំងពីរនេះ ដែលធ្លាប់បានផ្តល់ការគាំទ្រភាគីផ្ទុយគ្នានៅប្រទេសស៊ីរី អស់រយៈពេលជាច្រើនឆ្នាំកន្លងមក៕
