(សេអ៊ូល)៖ ក្រសួងការពារជាតិកូរ៉េខាងត្បូងបានបញ្ជាក់សាជាថ្មីថា ប្រព័ន្ធការពារមីស៊ីលកម្រិតខ្ពស់ THAAD ដែលអាមេរិកនឹងបញ្ជូនមកដល់គ្រប់គ្រឿងបរិក្ខានៅក្នុងខែមីនានេះ នឹងត្រូវធ្វើការដាក់ពង្រាយទៅតាមកាលកំណត់ បើទោះបីជាពេលនេះកូរ៉េខាងត្បូងកំពុងមានភាពតានតឹងផ្នែកនយោបាយ ដោយសារតែការទម្លាក់លោកស្រី ផាក គឺនហេ ពីតំណែងប្រធានាធិបតីកាលពីថ្ងៃសុក្រនោះក៏ដោយ។ នេះបើតាមការទីភ្នាក់ងារព័ត៌មានយ៉ុនហាប់ នាព្រឹកថ្ងៃសៅរ៍ ទី១១ ខែមីនា ឆ្នាំ២០១៧។
បន្ទាប់ពីការធ្វើតេស្តមីស៊ីល ៤គ្រាប់របស់កូរ៉េខាងជើងកាលពីដើមសប្តាហ៍នេះ តែមួយថ្ងៃបន្ទាប់ប៉ុណ្ណោះកូរ៉េខាងត្បូង និងអាមេរិកបានយកឱកាសបង្កើនល្បឿនដាក់ពង្រាយប្រព័ន្ធមីស៊ីល THAAD ដោយសម្រេចនាំចូលឧបករណ៍ពាក់ព័ន្ធនានាមកកាន់កូរ៉េខាងត្បូង នឹងគ្រោងធ្វើការដាក់ពង្រាយឲ្យបានរួចរាល់យ៉ាងហោចណាស់នៅចុងខែមេសា ខាងមុខនេះ។
មន្ត្រីយោធាកូរ៉េខាងត្បូងបានបញ្ជាក់យ៉ាងដូច្នេះថា «ប្រព័ន្ធមីស៊ីល THAAD នឹងត្រូវដាក់ពង្រាយតាមការព្រមព្រៀងរបស់សម្ព័ន្ធមិត្ត។ វាត្រូវបានជម្រុញល្បឿននៃការដាក់ពង្រាយ បើទោះបីជាកូរ៉េខាងត្បូងជួបប្រទះនូវវិបត្តិនយោបាយក៏ដោយ»។ គួរបញ្ជាក់ថាប្រទេសចិន និងរុស្ស៊ីបានបង្ហាញប្រតិកម្មយ៉ាងខ្លាំងចំពោះការដាក់ពង្រាយ THAAD នេះ ហើយបញ្ហាជាច្រើនមកហើយបានផ្ទុះឡើង ជាពិសេសគឺវិស័យទំនាក់ទំនងពាណិជ្ជកម្ម និងធ្វើដំណើររវាងចិននិងកូរ៉េខាងត្បូង ចាប់ផ្តើមកើតភាពរកាំរកូស៕
