(ប៉េកាំង)៖ សហរដ្ឋអាមេរិកបានបន្តរំលោភបំពានលើសិទ្ធិមនុស្ស នៅតាមបណ្តាប្រទេសដទៃៗជុំវិញពិភពលោក ដែលបានបង្កឲ្យជនស៊ីវិលស្លូតត្រង់ទទួលរងគ្រោះយ៉ាងច្រើនសន្ធឹកសន្ធាប់។ នេះបើតាមការបាយការណ៍មួយស្តីពីសិទ្ធិមនុស្សអាមេរិក ដែលត្រូវបានដកស្រង់ដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃព្រហស្បតិ៍ ទី០៩ ខែមីនា ឆ្នាំ២០១៧។
របាយការណ៍ការមានចំណងជើងថា «កំណត់ត្រាសិទ្ធិមនុស្សនៃសហរដ្ឋអាមេរិកក្នុងឆ្នាំ២០១៦» ដែលត្រូវបានចេញផ្សាយដោយការិយាល័យព័ត៌មាននៃក្រុមប្រឹក្សារដ្ឋរបស់ប្រទេសចិន បានរៀបរាប់ថា អាមេរិកបានរៀបចំកងកម្លាំងចម្រុះម្តងហើយម្តងទៀត ដើម្បីបើកការវាយប្រហារតាមផ្លូវអាកាសប្រឆាំងទៅលើកម្លាំងយោធានៅក្នុងប្រទេសអ៊ីរ៉ាក់ និងស៊ីរី។ ចាប់ពីថ្ងៃទី០៨ ខែសីហា ឆ្នាំ២០១៤ ដល់ថ្ងៃទី១៩ ខែធ្នូ ឆ្នាំ២០១៦ សហរដ្ឋអាមេរិកបានចេញប្រតិបត្តិការទម្លាក់គ្រាប់បែកប្រមាណ ៧,២៥៨លើកនៅអ៊ីរ៉ាក់ និង៥,៨២៨លើកនៅស៊ីរី ដែលបានបណ្តាលឲ្យមានហេតុការណ៍អាក្រក់ចំនួន ៧៣៣ករណី ជាមួយនិងប្រជាជនស៊ីវិលស្លូតត្រង់ដែលបានបាត់បង់ជីវិតចន្លោះពី៤,៥៦៨នាក់ ទៅ ៦,១២៧នាក់។
បន្ថែមពីនេះយោងតាមរបាយការណ៍ខាងលើដដែល បញ្ហានៃការចាប់ឃុំខ្លួនដោយខុសច្បាប់ និងការធ្វើទណ្ឌកម្មទៅលើអ្នកទោសនៃប្រទេសដទៃៗផ្សេងទៀត នៅតែមិនទាន់ត្រូវបានដោះស្រាយចេញ។ កាលពីឆ្នាំ២០០៩ រដ្ឋាភិបាលសហរដ្ឋអាមេរិកធ្លាប់បានសន្យាថា នឹងបិទពន្ធនាគារ Guantanamo Bay ដែលស្ថិតក្នុងប្រទេសគុយបា តែមកដល់ថ្ងៃទី០៤ ខែធ្នូ ឆ្នាំ២០១៦ នៅមានអ្នកទោសចំនួន៥៩នាក់ដដែលជាប់ឃុំខ្លួននៅក្នុងពន្ធនាគារនោះ។ ពន្ធនាគារ Guantanamo Bay របស់អាមេរិក ត្រូវបានប្រទេសជាច្រើនចាត់ទុកថាជាទីកន្លែងដែលបំពានសិទ្ធិមនុស្សដ៏ធ្ងន់ធ្ងរបំផុតមួយ ដែលអាមេរិកមិនអាចប្រកែកបាន។
ម៉្យាងវិញទៀតរបាយការណ៍ការសម្ងាត់មួយបានលាតត្រដាងឲ្យដឹងថា ក្នុងពន្ធនាគារនៃទីភ្នាក់ងារ CIA របស់អាមេរិកនៅអាហ្វហ្គានីស្ថានដែលគេស្គាល់ថា Salt Pit ជនសកម្មប្រយុទ្ធឈ្មោះ Gul Rahman ត្រូវបានគេដាក់ឲ្យនៅក្នុងបន្ទប់ដ៏ត្រជាក់បំផុត ហើយបានស្លាប់ដោយសារតែសីតុណ្ហភាពទាបខ្លាំងពេក ខណៈពេលកំពុងជាប់ឃុំខ្លួននៅទីនោះ។ របាយការណ៍ស្តីពីការរំលោភសិទ្ធិមនុស្សរបស់អាមេរិកនោះ ត្រូវបានសារព័ត៌មានចិននានា ដកស្រង់ធ្វើការចេញផ្សាយស្ទើរតែស្រុងតែម្តង ដោយមានរៀបរាប់ទាំងពេលវេលា ទីកន្លែង របៀបនៃការរំលោភសិទ្ធិមនុស្ស និងភ្នាក់ងារអាមេរិកដែលប្រព្រឹត្តទង្វើទាំងនោះ។
គួរបញ្ជាក់ថានៅក្នុងឯកសារមួយផ្សេងទៀតមានចំណងជើងថា «សេចក្តីលម្អិតនៃការដាក់សម្ពាធផ្លូវកាយ» ទីភ្នាក់ងារស៊ើបការណ៍សម្ងាត់ CIA បានធ្វើទណ្ឌកម្មទៅលើជនដែលជាប់ឃុំខ្លួន ដោយការទះកំផ្លៀង ក៏ដូចជាការប្រើសត្វល្អិត និងការកប់ទាំងរស់ជាដើម ហើយកាលពីខែវិច្ឆិកា ឆ្នាំ២០១៦ ប្រធានតុលាការអន្តរជាតិធ្លាប់បានឲ្យដឹងនៅក្នុងរបាយការណ៍មួយថា កងទ័ពអាមេរិកនិងភ្នាក់ងារ CIA ប្រហែលជាបានប្រព្រឹត្តឧក្រិដ្ឋកម្មសង្រ្គាម តាមរយៈការធ្វើទណ្ឌកម្មលើជនជាប់ឃុំខ្លួននៅប្រទេសអាហ្វហ្គានីស្ថាន៕
