(វ៉ាស៊ីនតោន)៖ សហរដ្ឋអាមេរិក​បានបើកការ​ស៊ើបអង្កេត​ហើយ លើករណី​លេចធ្លាយ​ឯកសារសម្ងាត់​ចេញផ្សាយ​ដោយ Wikileaks ស្ដីពី​​សមត្ថភាព Hack របស់​ទីភ្នាក់ងារ​ស៊ើបការសម្ងាត់​អាមេរិក CIA។ ក៏បុន្តែទន្ទឹមគ្នា​នោះដែរ CIA បានបដិសេធ​ក្នុងការទទួល​ស្គាល់​ភាពត្រឹមត្រូវ​នៃឯកសារ​ដែលបាន​បែកធ្លាយ។ នេះបើតាម​ការចេញផ្សាយ​ដោយ​សារព័ត៌មាន Russian Today នៅរសៀល​ថ្ងៃព្រហស្បតិ៍ ទី០៩ ខែមីនា ឆ្នាំ២០១៧។

កាលពី​ថ្ងៃអង្គារ Wikileaks បានចេញផ្សាយ​ឯកសារសម្ងាត់​ក្រោម​លេខកូដ Vault 7 ដោយក្នុង​នោះ​ផ្នែកទីមួយ​ហៅថា Year Zero មានឯកសារ​ជាង ៨,៧៦១ច្បាប់​ដែលនិយាយពី​សមត្ថភាព Hack របស់ CIA។ ជុំវិញបញ្ហា​នេះដែរ អតីតមន្រ្តី​ចារកម្មអាមេរិក​ម្នាក់​បានប្រាប់ Washington Post​ ថា FBI​​ និង CIA កំពុងធ្វើកិច្ច​សហប្រតិបត្តិការ​នៅក្នុងការ​ស៊ើបអង្កេត ខណៈFBI ផ្ទាល់​បានតាមដាន Wikileaks អស់រយៈពេល​ជាច្រើនឆ្នាំ ហើយការស៊ើប​អង្កេតលើ​ការបែកធ្លាយ​ឯកសម្ងាត់ Vault 7 អាចនឹងក្លាយ​ជាកម្មវត្ថុមួយ​ក្នុងការស្វែងរក​ជនបង្កប់ ដែលទម្លាយ​ឯកសារ​ដល់ Wikileaks។

គួរបញ្ជាក់ថា​បើតាមឯកសារ​សម្ងាត់របស់ Wikileaks CIA បានបង្កើត​កម្មវិធី​រាប់ពាន់​ក្នុងនោះរួម​មានទំាង​ការបង្កើតវីរុស និងកម្មវិធី​ជាច្រើន​ផ្សេងទៀត ដែលអនុញ្ញាត​ឱ្យខ្លួន​ចូល Hack ទិន្នន័យ ឬគ្រប់គ្រង​ឧបករណ៍​អេឡិចត្រូនិច ដូចជាទូរស័ព្ទដៃ​ស្មាតហ្វូន កុំព្យូរទ័រ ទូរទស្សន៍ និងរថយន្ដ​ទំនើបជាដើម ដើម្បីឆ្លបយកការណ៍​លើអ្នកប្រើប្រាស់។ ចំណែកឯ​ក្រុមហ៊ុន Microsoft Apple និង Samsung ក៏បានបង្ហាញ​ការព្រួយបារម្ភ​របស់ខ្លួនផងដែរ បន្ទាប់ពី​ការបែក​ធ្លាយឯកសារសម្ងាត់ CIA៕