ក្តៅ»! ធ្លាក់ឧទ្ធម្ភាគចក្រនៅជប៉ុន «បង្កឲ្យមនុស្សទាំងអស់០៩នាក់ស្លាប់» នៅតំបន់ភ្នំភាគកណ្តាលប្រទេស!
06-03-2017 15:13
(តូក្យូ)៖ មនុស្សទាំងអស់០៩នាក់បានស្លាប់ បន្ទាប់ពីឧទ្ធម្ភាគចក្រនៅតំបន់ភ្នំនៃខេត្ត Nagano ភាគខាងកណ្តាលប្រទេសជប៉ុន ដោយក្រុមសង្គ្រោះនៃកងកម្លាំងស្វ័យការពារជប៉ុនបានព្យាយាមស្វែងរករហូតដល់ឃើញ បន្ទាប់ពីមានសេចក្តីរាយការណ៍ថាវាបានបាត់ដំណឹងជាមួយនឹងមនុស្ស០៩នាក់កាលពីរសៀលថ្ងៃអាទិត្យ។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃចន្ទ ទី០៦ ខែមីនា ឆ្នាំ២០១៧។
គួរបញ្ជាក់ថាកងកម្លាំងស្វ័យការពារជប៉ុន SDF បានរកឃើញសាកសពទាំងអស់ ដែលសុទ្ធសឹងតែជាបុរសនិងបំណែកនៃឧទ្ធម្ភាគចក្រ Bell 412 EP របស់រដ្ឋាភិបាលជប៉ុន ដែលប្រើប្រាស់ដើម្បីធ្វើសមយុទ្ធក្នុងន័យជួយសង្គ្រោះអ្នកឡើងភ្នំដែលជាប់ខ្លួនមិនអាចចុះមកវិញបាន។ យន្តហោះបានធ្លាក់នៅលើភ្នំ Machibuse នៃខេត្ត Nagano ដែលមូលហេតុធ្លាក់កំពុងស្ថិតនៅក្នុងការស៊ើបអង្កេតនៅឡើយ៕
