(គូឡាឡាំពួរ)៖ បុរស០៧នាក់ ត្រូវបានចាប់ខ្លួនកាលពីខែកុម្ភៈកន្លងទៅ ក្រោមបទសង្ស័យថា មានជាប់ពាក់ព័ន្ធ នឹងសកម្មភាពភេរវកម្ម តាមការបង្គាប់បញ្ជា ពីខ្សែបណ្ដាញក្រុម ISIS នៅក្នុងតំបន់អាស៊ីអាគ្នេយ៍​។ នេះបើតាមប៉ូលិស ជាតិម៉ាឡេស៊ី ដកស្រង់ដោយសារព័ត៌មាន Channel News Asia ​នៅថ្ងៃអាទិត្យ ទី០៥​ ខែមីនា ឆ្នាំ២០១៧។

ជុំវិញការចាប់ខ្លួននេះដែរ ថ្លែងនៅក្នុងសេចក្ដីថ្លែងការណ៍មួយ មេបញ្ជាការប៉ូលិស លោក Khalid Abu Bakar បានឱ្យដឹងថាជនសង្ស័យ០២នាក់ ក្នុងចំណោម ០៧នាក់ ត្រូវបានចាប់ខ្លួនកាលពីថ្ងៃទី២១ ខែកុម្ភៈ ដោយសង្ស័យថា មានទំនាក់ទំនងជាមួយនឹងបណ្ដាញក្រុម ISIS​ ហើយពួកគេទំាងពីរនាក់គឺជាពលរដ្ឋ ម៉ាឡេស៊ី ម្នាក់មានអាយុ៤១ឆ្នាំ និងម្នាក់ទៀតអាយុ២៨ឆ្នាំ​ ព្រមទាំងបម្រើការងារជាអ្នកបច្ចេកទេស នៅក្នុងរោងចក្រមួយកន្លែង ជាទីដែលពួកគេត្រូវ បានឃាត់ខ្លួន នៅក្នុងតំបន់កេពុង (Kepong) នៃទីក្រុងគូឡាឡាំពួ។ ម្យ៉ាងវិញទៀត បើតាមក្រុមអ្នកស៊ើបអង្កេត ពួកគេបានទទួលបញ្ជាដោយផ្ទាល់ពីបុរសម្នាក់ឈ្មោះ Mohamad Wanndy Mohamad Jedi ឱ្យប្រព្រឹត្តសកម្មភាពវាយប្រហារបំផ្ទុះគ្រាប់បែកនៅក្នុងប្រទេសម៉ាឡេស៊ី មុននឹងធ្វើដំណើរទៅចូលជាមួយក្រុម ISIS​ នៅស៊ីរី។

គួរបញ្ជាក់ថា ជនសង្ស័យដែលនៅសល់ មានម្នាក់ជាពលរដ្ឋនៃប្រទេសក្នុងតំបន់អាស៊ីអាគ្នេយ៍ មានអាយុ៣៧ឆ្នាំ ត្រូវបានចាប់ខ្លួននៅក្នុងតំបន់ Petaling Jaya នៃខេត្ត Selangor កាលពីថ្ងៃទី២៣ ខែកម្ភៈ ខណៈជនសង្ស័យ០៤នាក់ផ្សេងទៀត គឺជាជនជាតិយេមែន ត្រូវបានចាប់ខ្លួនកាលពីថ្ងៃទី២៦ ខែកុម្ភៈ នៅឯតំបន់ Serdang និង Cyberjaya ស្ថិតក្នុងខេត្ត Selangor៕