(វ៉ាលីងតោន)៖ យោធា និងរដ្ឋបាលការពារជាតិនូវែលសេឡង់កំពុងសម្លឹងរកមើលកន្លែងសាងសង់ទីស្នាក់កណ្ដាលថ្មីរបស់ខ្លួនបន្ទាប់ពីគ្រោះរញ្ជួយដីដ៏កក្រើកកម្រិត៧.៨រ៉ិចទ័រ បានបំផ្លាញទីស្នាក់ការចាស់កាលពីខែវិចិ្ឆកា ឆ្នាំ២០១៦កន្លងទៅ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ិនហួរ នៅព្រឹកថ្ងៃសៅរ៍ ទី០៤ ខែមីនា ឆ្នាំ២០១៧។
ទីស្នាក់ការចាស់ដែលមានចំណាស់ជាង១០ឆ្នាំរបស់ក្រសួងការពារជាតិ និងកងកម្លាំងការពារជាតិនូវែលសេឡង់ (NZDF) បានទទួលរងការខូចខាតយ៉ាងដំណំដោយសារគ្រោះរញ្ជួយដីកាលពីឆ្នាំមុន។ ជុំវិញបញ្ហានេះដែរ NZDF បានឱ្យដឹងនៅថ្ងៃសុក្រសប្តាហ៍នេះថា ពួកគេនឹងចាប់ផ្ដើមកសាងទីស្នាក់ការកណ្តាលថ្មីនៅក្នុងពេលឆាប់ៗនេះ ដែលនឹងត្រូវចំណាយប្រាក់ដ៏ច្រើនសន្ធឹកសន្ធាប់ ក៏ប៉ុន្តែពុំទាន់បានបញ្ជាក់ពីចំនួនទឹកប្រាក់ត្រូវចំណាយនៅឡើយនោះទេ។
គួររំលឹកថាកាលពីថ្ងៃទី១៤ ខែវិចិ្ឆកា ឆ្នាំ២០១៦ គ្រោះរញ្ជួយដីកំរិតដ៏ខ្លំាងក្លាមួយមានកម្រិត ៧.៨ រ៉ិចទ័រ បានវាយប្រហារមកលើតំបន់ឆ្នេរ Kaikoura ជាមួយនឹងការបំផ្លិចបំផ្លាញអាគារជាច្រើន រួមមានទំាងអាគាររដ្ឋាភិបាល និងផ្ទះសម្បែងប្រជាជនជាច្រើនផងដែរ៕
