(វ៉ាស៊ីនតោន)៖ ប្រធានាធិបតីនៃសហរដ្ឋអាមេរិកលោក ដូណាល់ ត្រាំ បានបញ្ជាក់ពីជំហរគាំទ្រយ៉ាងពេញទំហឹងរបស់លោកចំពោះអង្គការ NATO ប៉ុន្តែលោកក៏មិនភ្លេចបញ្ជាក់ពីជំហរឥតងាករេមួយទៀតផងដែរ នោះគឺការអំពាវនាវឲ្យសមាជិកទាំងអស់ ជួយបំពេញកាតព្វកិច្ចលើការចំណាយ ដើម្បីសុវត្ថិភាពរបស់ពួកគេរៀងៗខ្លួន។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃពុធ ទី០១ ខែមីនា ឆ្នាំ២០១៧។
ការថ្លែងបញ្ជាក់របស់លោក ដូណាល់ ត្រាំ ខាងលើនេះបានធ្វើឡើងនៅក្នុងវិមានកាពីតូល (វិមានសភា Capital Hill) កណ្តាលរដ្ឋធានីវ៉ាស៊ីនតោន ទីដែលលោកបាននិងកំពុងធ្វើសេចក្តីថ្លែងសារជាលើកដំបូងចំពោះមុខក្រសែភ្នែកប្រជាជនអាមេរិកគ្រប់រូប។ សម្រាប់ការទាមទាររបស់លោក ត្រាំ ខាងលើនេះក៏បានបង្កជាការព្រួយបារម្ភរួចទៅហើយផងដែរ សម្រាប់ប្រទេសជាសមាជិកអង្គការ NATO ទាំង ២៧ផ្សេងទៀតជាពិសេសប្រទេសធំៗដែលនឹងមានការចំណាយច្រើនដូចជា អាល្លឺម៉ង់ជាដើម។
គួរបញ្ជាក់ថាបច្ចុប្បន្ននេះ បណ្តាប្រទេសជាសមាជិកអង្គការ NATO ជាពិសេសនៅតាមតំបន់ជាប់ព្រំដែនរុស្ស៊ី ហាក់កាន់តែទទួលរងសម្ពាធខ្លាំងឡើងៗ ដោយសារតែការបង្កើនវត្តមានយោធា និងភាពតានតឹងជាមួយនឹងប្រទេសរុស្ស៊ី។ កងទ័ពអាមេរិក សព្វាវុធ និងកងទ័ពសម្ព័ន្ធមិត្តផ្សេងៗទៀតត្រូវបានដាក់ឲ្យហ្វឹកហ្វឺនរួចមកហើយនៅតំបន់ព្រំដែនអឺរ៉ុបខាងកើត ដើម្បីតទល់នឹងការបង្កើនឥទ្ធិពលដូចគ្នាពីសំណាក់រុស្ស៊ី ខណៈដែលជម្លោះនៅភាគខាងកើតអ៊ុយក្រែន ក៏មិនទាន់មានការដោះស្រាយនៅឡើយ៕
