(វ៉ាស៊ីនតោន)៖ មនុស្សយ៉ាងហោចណាស់ចំនួនបួននាក់បានបង់ជីវិត និងពីរនាក់ផ្សេងទៀតបានទទួលរងរបួស បន្ទាប់ពីយន្តហោះខ្នាតតូចធុន Cessna 310 មួយគ្រឿង បានធ្លាក់ចំសង្កាត់មួយកន្លែងដែលស្ថិតនៅភាគខាងកើតនៃអាកាសយានដ្ឋានទីក្រុង Riverside ក្នុងរដ្ឋកាលីហ្វរញ៉ាសហរដ្ឋអាមេរិក ហើយបានបណ្តាលឲ្យលំនៅឋានមួយចំនួនឆាបឆេះឡើង។ នេះបើតាមការចេញផ្សាយដោយសារព័ត៌មានរុស្ស៊ី Russia Today (RT) នៅមុននេះបន្តិចនារសៀលថ្ងៃអង្គារ ទី២៨ ខែកុម្ភៈ ឆ្នាំ២០១៧។
យោងតាមអ្នកនាំពាក្យរដ្ឋបាលអាកាសចរណ៍សហព័ន្ធ (FAA) លោក Ian Gregor យន្តហោះខាងលើបានធ្លាក់ទៅក្នុងសង្កាត់មួយកន្លែងសម្បូរដោយប្រជាជនរស់នៅ នៅក្រោយពេលហោះចាកចេញពីព្រលាន Riverside បានតែបន្តិចប៉ុណ្ណោះនៅតាមផ្លូវធ្វើដំណើរឆ្ពោះទៅកាន់ទីក្រុង San Jose នៃរដ្ឋកាលីហ្វរញ៉ា។
នៅក្រោយហេតុការណ៍គ្រោះថ្នាក់នេះ ជនដែលនៅរស់រានមានជីវិតម្នាក់បានឲ្យដឹងថា មនុស្សសរុបចំនួនប្រាំនាក់បានធ្វើដំណើរនៅលើយន្តហោះនោះ ដោយវិលត្រឡប់មកពីកន្លែងកម្សាន្ត Disney Land។ ដោយឡែកមនុស្សពីរនាក់ដែលបានរងរបួសកំពុងទទួលការព្យាបាលនៅឯមន្ទីរពេទ្យ ខណៈក្រុមពន្លត់អគ្គីភ័យប្រមាណជា៦០នាក់កំពុងនៅបន្តតាមស្វែងរកមនុស្សយ៉ាងតិចចំនួនពីរនាក់ ដែលបាត់ខ្លួនផ្សេងទៀត បន្ទាប់ពីផ្ទះរបស់ពួកគេត្រូវបានបំផ្លិចបំផ្លាញដោយសារការធ្លាក់យន្តហោះចំនេះ។
គួរបញ្ជាក់ថាយោងតាមមន្រ្តីប៉ូលិសទីក្រុង Riverside លំនៅឋានចំនួនពីរខ្នងបានទទួលរងការបំផ្លាញនៅក្នុងហេតុការណ៍ខាងលើ រីឯប្រជាជនដែលរស់នៅផ្ទះក្បែរៗនោះត្រូវបានជម្លៀសខ្លួនចេញ ទៅកាន់ទីសុវត្ថិភាព ស្របពេលដែលអាជ្ញាធរបានបិទតំបន់ជុំវិញកន្លែងកើតហេតុជាបណ្តោះអាសន្នសិន ខណៈមូលហេតុនៃការណ៍ធ្លាក់យន្តហោះខ្នាតតូចមួយគ្រឿងនេះ ពុំទាន់ត្រូវបានគេដឹងច្បាស់នៅឡើយទេ៕
