(តូក្យូ)៖ ព្រះចៅអធិរាជជប៉ុនបានយាងចាកចេញទៅកាន់ប្រទេសវៀតណាមហើយនៅថ្ងៃអង្គារនេះ ដើម្បីជួបជាមួយក្រុមគ្រួសារនាយទាហានជប៉ុនដែលត្រូវបានបញ្ជូនទៅកាន់ទីនោះ ដោយព្រះបិតារបស់ព្រះអង្គកាលពីជាង០៧ទសវត្សរ៍កន្លងផុតទៅ នៅអំឡុងសង្រ្គាមលោកលើកទីពីរ។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនារសៀលថ្ងៃអង្គារ ទី២៨ ខែកុម្ភៈ ឆ្នាំ២០១៧។
ថ្លែងនៅអាកាសយានដ្ឋាន Haneda នៃទីក្រុងតូក្យូព្រះចៅអធិរាជ អាគីហីតុ បានមានព្រះរាជបន្ទូលថាយ៉ាងដូច្នេះថា «វាគឺជាក្តីបំណងរបស់យើងដែលថា ការបំពេញដំណើរទស្សនកិច្ចទៅកាន់ប្រទេសវៀតណាមនេះ នឹងបន្តចូលរួមចំណែកកាន់តែប្រសើរបន្ថែមទៀតទៅក្នុងការអភិវឌ្ឍនៃការយោគយល់ និងអធ្យាស្រ័យគ្នាទៅវិញទៅមក ក៏ដូចជាទំនាក់ទំនងជាមិត្តភាពរវាងប្រទេសយើងទាំងពីរ»។
យោងតាមទីភ្នាក់ងារទទួលបន្ទុកកិច្ចការព្រះរាជវាំង ព្រះចៅអធិរាជជប៉ុន និងអគ្គមហេសី មីឈីកុ ត្រូវបានកំណត់ពេលវេលាថា នឹងយាងទៅកាន់រដ្ឋធានីហាណូយ និងទីក្រុង Hue។ ដោយឡែកនៅថ្ងៃព្រហស្បត៍សប្តាហ៍នេះទ្រង់ទាំងពីរអង្គ នឹងយាងជួបជាមួយសមាជិកនៃក្រុមគ្រួសាររបស់ពលទាហានជប៉ុនមួយចំនួន ដែលបានសម្រេចចិត្តតាំងទីលំនៅក្នុងប្រទេសវៀតណាម នៅក្រោយការបញ្ចប់សង្រ្គាមលោកលើកទីពីរ។ ម៉្យាងវិញទៀតនេះគឺជាដំណើរទស្សនកិច្ចលើកទីមួយរបស់ទ្រង់ទាំងពីរអង្គទៅកាន់ប្រទេសអាស៊ានមួយនេះ។
គួរបញ្ជាក់ថាបន្ទាប់ពីប្រទេសវៀតណាម ព្រះចៅអធិរាជជប៉ុន អាគីហីតុ រួមទាំងព្រះអគ្គមហេសី នឹងយាងដំណើរបន្តឆ្ពោះទៅកាន់ទីក្រុងបាងកកនៃប្រទេសថៃទៀត នៅថ្ងៃអាទិត្យសប្តាហ៍ដដែលនេះ ដើម្បីសម្តែងការស្វាគមន៍ចំពោះព្រះមហាក្សត្រថៃ ព្រះបាទ មហា វិច្ឆិរ៉ាឡុងកន ដែលបានឡើងគ្រងរាជនៅក្រោយកាលសោយទិវង្គតរបស់ព្រះបិតាទ្រង់គឺព្រះបាទ ភូមិបុល អាប់ឌុលយ៉ាដេត កាលពីខែតុលា ឆ្នាំ២០១៦កន្លងទៅនេះ៕
