(កាប៊ុល)៖ កូនក្មេងសិស្សសាលាយ៉ាងតិចណាស់ចំនួនពីរនាក់ត្រូវគេបញ្ជាក់ថា បាត់បង់ជីវិត និងពីរនាក់ផ្សេងទៀតទទួលរងរបួសយ៉ាងដំណំ នៅក្នុងហេតុការណ៍បាញ់គ្រាប់ផ្លោងយ៉ាងព្រៃផ្សៃមួយចូលទៅក្នុងសាលារៀនរបស់ពួកគេ ដែលស្ថិតខេត្ត Laghman ភាគខាងកើតនៃប្រទេសអាហ្វហ្គានីស្ថាន។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នៅមុននេះបន្តិចនារសៀលថ្ងៃសៅរ៍ ទី២៥ ខែកុម្ភៈ ឆ្នាំ២០១៧។
យោងតាមសម្តីរបស់អ្នកនាំពាក្យរដ្ឋបាលខេត្ត Langhman លោក Sarhadi Zawak ថ្លែងប្រាប់ក្រុមអ្នកសារព័ត៌មានថា ការវាយប្រហារដោយគ្រាប់ផ្លោងខាងលើនេះ ត្រូវបានធ្វើឡើងដោយក្រុមសកម្មប្រយុទ្ធប្រឆាំងរដ្ឋាភិបាល នៅវេលាម៉ោង ១១៖០០ព្រឹកថ្ងៃសៅរ៍នេះ (ពេលវេលានៅអាហ្វហ្គានីស្ថាន) ហើយវាបានធ្លាក់ចំសាលារៀនមួយកន្លែង នៅក្រៅទីក្រុង Mehtarlam និងបានផ្តាច់យកជីវិតកូនក្មេងសិស្សសាលាស្លូតត្រង់ចំនួនពីរនាក់នៅនឹងកន្លែង និងបណ្តាលឲ្យពីរនាក់ផ្សេងរងរបួសក្នុងនោះមានកូនសិស្សម្នាក់ និងគ្រូបង្រៀនម្នាក់ទៀត។
គួរបញ្ជាក់ថា ជនរងរបួសទាំងពីរនាក់នោះត្រូវបានបញ្ជូនទៅកាន់មន្ទីរពេទ្យជាបន្ទាន់ហើយ ដើម្បីទទួលការព្យាបាល ខណៈក្រុមឧទ្ទាមតាលីបង់ដែលជាក្រុមមានសកម្មភាពដ៏មមាញឹកនៅតាមផ្នែកនៃខេត្ត Laghman មិនទាន់បានចេញមុខអះអាងថា ជាអ្នកនៅពីក្រោយហេតុការណ៍ដ៏ឃោឃៅមួយនេះនៅឡើយទេ៕
