(វ៉ាស៊ីនតោន)៖ អភិបាលរដ្ឋ Iowa លោក Terry Branstad ដែលត្រូវបានជ្រើសរើសដោយប្រធានាធិបតីសហរដ្ឋអាមេរិកលោក ដូណាល់ ត្រាំ សម្រាប់មុខតំណែងជាឯកអគ្គរដ្ឋទូតប្រចាំទីក្រុងប៉េកាំង បានបង្ហាញគោលជំហរកាន់ទន់ភ្លន់បន្ថែមទៀតចំពោះប្រទេសចិន ដោយនៅថ្ងៃព្រហស្បតិ៍នេះ (ពេលនៅរដ្ឋធានីវ៉ាស៊ីនតោន) លោក Branstad បានបញ្ជាក់ថារូបលោកនឹងខិតខំធ្វើយ៉ាងណាធានាឲ្យបានពីកំណើនជាបន្តបន្ទាប់នៃវិស័យចេញផ្នែកកសិកម្មអាមេរិកទៅកាន់ចិន នៅពេលដែលរូបលោកឡើងកាន់តួនាទីថ្មីនាពេលឆាប់ៗខាងមុខ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃសុក្រ ទី២៤ ខែកុម្ភៈ ឆ្នាំ២០១៧។
ថ្លែងក្នុងវេទិកាប្រចាំឆ្នាំស្តីពីទស្សនវិស័យនៃកសិកម្មរបស់ក្រសួងកសិកម្មអាមេរិក លោក Branstad បានលើកឡើងថា «ទំនាក់ទំនងអាមេរិក-ចិនអាចផ្តល់ឱកាសជាច្រើនដើម្បីបន្តបង្កើនការនាំចេញនៃវិស័យកសិកម្មទៅកាន់ប្រទេសចិន ហើយខ្ញុំរំពឹងថានឹងអាចក្លាយជាអ្នកសម្របសម្រួលដ៏មានប្រសិទ្ធភាពបំផុតមួយសម្រាប់គ្រប់វិស័យនាំចេញផ្នែកកសិកម្មទាំងអស់នៅក្នុងមុខតំណែងថ្មីនេះ»។
លោក Terry Branstad ក៏បានអះអាងដែរថារូបលោកនឹងប្រើប្រាស់ទំនាក់ទំនងដ៏យូរអង្វែងរវាងលោកនិងមន្រ្តីជាន់ខ្ពស់រដ្ឋាភិបាលចិនដើម្បីទទួលបានការអនុញ្ញាតយ៉ាងឆាប់រហ័សរបស់ទីក្រុងប៉េកាំងចំពោះការបង្កើនការនាំចូលផ្នែកវិស័យកសិកម្មរបស់សហរដ្ឋអាមេរិក ហើយលោក Branstad ជឿជាក់ថាមិត្តភាពនិងការជឿទុកចិត្តគ្នាអាចជួយកាត់បន្ថយភាពរាំងស្ទះមួយចំនួន ដើម្បីបង្កើនការធ្វើពាណិជ្ជកម្មទ្វេភាគីពាក់ព័ន្ធនឹងវិស័យកសិកម្ម។
គួរបញ្ជាក់ថាលោក Terry Branstad វ័យ៧០ឆ្នាំ ជាអភិបាលដែលបានបម្រើជាតិយូរជាងគេបង្អស់នៅសហរដ្ឋអាមេរិក និងជាបុគ្គលមួយរូបដែលបានបង្កើតនិងរក្សាទំនាក់ទំនងយ៉ាងជិតស្និទ្ធយូរអង្វែងជាមួយរដ្ឋាភិបាលទីក្រុងប៉េកាំង ហើយបានធ្វើដំណើរទៅកាន់ប្រទេសចិនជាច្រើនលើកផងដែរ។ លោក Branstad បានបំពេញតួនាទីជាអភិបាលរដ្ឋ Iowa ពីឆ្នាំ១៩៨៣ដល់១៩៩៩ និងម្តងទៀតចាប់តាំងពីឆ្នាំ២០១១រហូតដល់បច្ចុប្បន្ន ហើយរូបលោកត្រូវបានលោក ដូណាល់ ត្រាំ ជ្រើសរើសធ្វើបេក្ខជនឯកអគ្គរដ្ឋទូតអាមេរិកប្រចាំប្រទេសចិនកាលខែធ្នូ ឆ្នាំ២០១៦កន្លងទៅនេះ៕
