(ប៉េកាំង)៖ ប្រទេសចិននៅថ្ងៃអង្គារនេះបានអះអាងថា ទីក្រុងប៉េកាំងជំទាស់ចំពោះសកម្មភាពរបស់ប្រទេស​នានាដែលយកហេតុផលរឿងការពារសេរីភាពនៃការធ្វើនាវាចរ ក្នុងការរំលោភមកលើ​ដែនអធិបតេយ្យ​របស់ចិន ដែលការប្រកាសបែបនេះបានធ្វើឡើងបន្ទាប់ពីក្រុមនាវាដឹកយន្តហោះចម្បាំង​របស់អាមេរិក ចាប់ផ្តើម​ធ្វើការល្បាត​នៅតំបន់ជម្លោះ​នៃសមុទ្រចិន​ខាងត្បូង។ នេះបើតាម​ការចេញផ្សាយ​នៅមុននេះ​បន្តិច​ដោយ​សារព័ត៌មាន Channel News Asia នាល្ងាច​ថ្ងៃអង្គារ ទី២១ ខែកុម្ភៈ ឆ្នាំ២០១៧។

យោធា​ជើងទឹករបស់​អាមេរិកបាន​ប្រកាសថា ក្រុមប្រយុទ្ធ​នៃកងនាវា​អាមេរិក​នោះ មាននាវា​ដឹកយន្តហោះ​ចម្បាំង​លំដាប់ Nimitz USS Carl Vinson បានចាប់​ផ្តើមបំពេញ​ប្រតិបត្តិការ​របស់ខ្លួននៅតំបន់​សមុទ្រ​ចិន​ខាងត្បូង​កាលពីថ្ងៃសៅរ៍​សប្តាហ៍មុន បើទោះបីជា​មានការព្រមាន​ពីចិន ព្រមទាំង​នៅក្នុងខណៈពេលដែល​ភាពតានតឹងនៅតែ​បន្ត​ចំពោះតំបន់សមុទ្រដ៏ធំ និងសម្បូរដោយ​ធនធានរ៉ែនេះ​ក៏ដោយ។

អ្នកនាំពាក្យ​ក្រសួងការបរទេស​ចិន Geng Shuang បាននិយាយ​នៅថ្ងៃអង្គារនេះ​ថា «ប្រទេសចិនតែងតែ​គោរពនូវ​សិទ្ធិសេរីភាព​នៃការធ្វើនាវាចរ ហើយនឹង​ស្វាគមន៍ចំពោះ​ប្រទេសគ្រប់គ្នា​ដែលគោរព​ចំពោះ​ច្បាប់​អន្តរជាតិ។ ប៉ុន្តែយើង​សូមប្រឆាំង​យ៉ាងដាច់ខាត​ទៅនឹងប្រទេស​ណាក៏ដោយ ដែលបង្ក​ការគំរាម​កំហែង និងបំផ្លាញ​នូវអធិបតេយ្យភាព ព្រមទាំងសន្តិសុខ​របស់ប្រទេសដទៃ ដោយយកទង់​នៃសេរីភាព​ការធ្វើនាវាចរ​មកបាំងមុខ»