(គូឡាឡាំពួរ)៖ ឯកអគ្គរដ្ឋទូត​កូរ៉េខាងជើង​ប្រចាំទីក្រុងគូឡាឡាំពួរ​នៅថ្ងៃចន្ទនេះ បានអះអាងថា ការស៊ើប​អង្កេត​របស់​ប៉ូលិស​ម៉ាឡេស៊ី​​ជុំវិញ​អំពើ​ឃាតកម្ម​ កាលពីសប្តាហ៍​មុនទៅ​លើ​លោក គីម ជុងណាំ នៅឯអាកាសយានដ្ឋាន​នៃរដ្ឋធានី​គូឡាឡាំពួរ ដូចជាមិន​គួរឲ្យទុកចិត្តបាន​នោះ​ទេ​ ហើយថែម​ទាំងបាន​ទទូចដូច្នេះ​ទៀតថា ជនគ្រោះ​រូបនេះ​តាមពិតមិនមែន​ជាលោក គីម ជុងណាំ ដែលត្រូវ​ជាបងប្រុសម្តាយទីទៃ​​របស់មេ​ដឹក​នាំ​​កូរ៉េខាងជើង​លោក គីម ជុងអ៊ុន នោះឡើយ។ នេះបើតាម​ការចេញ​ផ្សាយ​ដោយ​សារព័ត៌មាន Channel News Asia នៅមុននេះ​បន្តិចនា​រសៀល​ថ្ងៃចន្ទ ទី២០ ខែកុម្ភៈ ឆ្នាំ២០១៧។

ដោយផ្ទុយពីអាជ្ញាធរម៉ាឡេស៊ីដែលបានធ្វើការអះអាងថាជនរងគ្រោះនៅក្នុងអំពើឃាតកម្មខាងលើថា​ជាលោក គីម ជុងណាំ នោះឯកអគ្គរដ្ឋ​ទូតកូរ៉េខាងជើងលោក កាល ចុង (Kang Chol) បានថ្លែង​ប្រាប់​ក្រុម​អ្នកសារព័ត៌មាន​ថា​ ស្ថានទូត​កូរ៉េខាងជើង​ប្រចាំនៅ​រដ្ឋធានីគូឡាឡាំពួរ​​​នៃ​ប្រទេស​ម៉ាឡេស៊ី បានកំណត់​អត្តសញ្ញាណ​របស់ជនរងគ្រោះ​ថា​ ជាជនឈ្មោះ គីម ចុល (Kim Chol) តែប៉ុណ្ណោះ​ដោយយោង​ទៅលើ​លិខិត​ឆ្លង​ដែន​នៅជាប់ខ្លួនរបស់បុគ្គល​រូបនេះ។

នៅក្រោយពេលត្រូវបានកោះហៅ​ដោយក្រសួង​ការបរទេស​ម៉ាឡេស៊ីឲ្យ​ចូលទៅ​ស្រាយបំភ្លឺ ​ជុំវិញការ​ចោទប្រកាន់​ដទៃផ្សេង​ទៀត​ជុំវិញ​​មន្ទិល​សង្ស័យ​នៃការស៊ើប​អង្កេតរបស់​អាជ្ញាធរ​ទីក្រុងគូឡាឡាំពួរ​លោក កាង ចុល បានលើក​ឡើងថា «រយៈពេល០៧ថ្ងៃ​បានកន្លង​ផុតទៅហើយ​​គិត​ចាប់​តាំងពី​ពេលកើត​ហេតុ ក៏ប៉ុន្តែយើង​ឃើញថា​ នៅពុំទាន់​មានភស្តុតាង​ជាក់លាក់​ណាមួយ​ស្តីពីមូលហេតុ​នៃការស្លាប់​របស់​ជនរងគ្រោះ​នោះ​​ឡើយ ហើយនាពេលនេះ​យើងមិនអាច​ទុកចិត្ត​លើការស៊ើប​អង្កេត​របស់ប៉ូលិស​ម៉ាឡេស៊ី​បាន​នោះទេ»។ លោក កាង បាន​បន្ថែមថា «ស្ថានទូត​​របស់យើង​បានកំណត់​អត្តសញ្ញាណ​របស់ជនរង​គ្រោះហើយថា​ មានឈ្មោះ គីម ចុល ដែលជនជាតិ​កូរ៉េខាងត្បូង​ម្នាក់ ដូចទៅនឹង​លិខិតឆ្លង​ដែន​របស់ជនរង​គ្រោះ​រូបនេះ»

គួរបញ្ជាក់ថា​យោងតាមក្រសួង​សុខាភិបាល​ម៉ាឡេស៊ី លទ្ធផល​នៃការធ្វើកោសល្យវិច័យ​លើសាកសពលោក គីម ជុងណាំ នឹងត្រូវប្រកាស​ឲ្យ​បានដឹងនៅថ្ងៃពុធសប្តាហ៍នេះហើយ៕