(បាងកក)៖ គ្រោះថ្នាក់ចរាចរណ៍​រវាងរថភ្លើងមួយខ្សែ និងរថយន្តមួយគ្រឿង​​បានបណ្តាលឲ្យ​​មនុស្ស​ម្នាក់ស្លាប់ និង០៣នាក់ទៀតរង​របួសនៅខេត្ត Surat Thani ភាគខាងត្បូង​ប្រទេសថៃ។ នេះបើ​តាម​ការចេញ​ផ្សាយ​នៅមុននេះ​បន្តិច ដោយទីភ្នាក់ងារ​ព័ត៌មានចិនស៊ិនហួរ នារសៀលថ្ងៃ​ចន្ទ ទី២០ ខែកុម្ភៈ ឆ្នាំ២០១៧។

តាមការដកស្រង់​ព័ត៌មានបន្ថែម​ពីបាងកកប៉ុស្តិ៍ គ្រោះថ្នាក់ខាងលើនេះ​បានកើតឡើងកាលពី​យប់ថ្ងៃអាទិត្យ​ដោយរថយន្ត​មួយគ្រឿងបានបើកឡើងផ្លូវរថភ្លើង រួចក៏ត្រូវរភ្លើងដែល​កំពុងបោះពួយយ៉ាងលឿន​បុកចំមួយ​ទំហឹងតែម្តងបណ្តាល​ឲ្យអ្នកជិះនៅលើ​​រថយន្តម្នាក់ស្លាប់ និងអ្នក​រួមដំណើរ០៣នាក់​ទៀតរង​របួស​​ធ្ងន់ និងស្រាល​ដែលអ្នកស្លាប់គឺជាតៃកុងឡាន (ស្លាប់ពេលទៅដល់មន្ទីរពេទ្យ)​។

គួរបញ្ជាក់ថារថយន្តត្រូវបានសមត្ថកិច្ចថៃអះអាងថា ខ្ទេចខ្ទីអស់តែម្តង ខណៈរថភ្លើងបានខូចខាតតែ​ផ្នែកមុខ​បន្តិចបន្តួច​ប៉ុណ្ណោះ។ សមត្ថកិច្ចបន្ថែម​ទៀតថា នៅពេលគ្រោះថ្នាក់​កើតឡើងនោះ​គឺកន្លែងរថយន្ត​ឆ្លងកាត់​ផ្លូវ​រថយន្តភ្លើង​ពុំបានដាក់របាំង​ការពារសុវត្ថិភាព​នោះឡើយ។ របាយការណ៍​ពីអន្តរជាតិឲ្យដឹងថា​​ជារៀងរាល់ឆ្នាំ​មានចំនួនមនុស្សស្លាប់​ដោយសារ​គ្រោះថ្នាក់ចរាចរណ៍​នៅទូទាំងប្រទេសថៃ មិនក្រោម ២៤,០០០នាក់​នោះ​ឡើយ៕