(​សេអ៊ូល)៖ ទោះបីជាដឹងថា​មិនអាចទៅរួច​ក៏ដោយ អ្នកតំណាងរាស្ត្រ​កូរ៉េ​ខាងត្បូង លោក ផាក ជីវ៉ុន (Park Jie-won) ដែលជា​ប្រធានគណបក្ស​ប្រជាជនកូរ៉េនៅថ្ងៃចន្ទនេះ បានជំរុញឱ្យ​រដ្ឋាភិបាល​ម៉ាឡេស៊ី ស្នើសុំទៅ​កូរ៉េខាងជើង​ក្នុងការធ្វើបត្យាប័ននាំជនសង្ស័យ​ជាប់ពាក់ព័ន្ធនឹង​អំពើឃាតកម្មលើ លោក គីម​ ជុងណាំ ត្រឡប់ទៅម៉ាឡេស៊ី ដើម្បីដឹកនាំ​ការស៊ើបអង្កេត​ឱ្យកាន់តែស៊ីជំរៅ។ នេះបើតាម​ការចេញផ្សាយ ដោយទីភ្នាក់ងារ​សារព័ត៌មាន យ៉ុនហាប់ នៅព្រឹកថ្ងៃចន្ទ ទី២០ ខែកុម្ភៈ ឆ្នាំ២០១៧។

ប្រតិកម្មរបស់ លោក ផាក ជីវ៉ុន ធ្វើឡើងបន្ទាប់ពី​ប៉ូលិស​ម៉ាឡេស៊ី បានបញ្ជាក់​កាលពីថ្ងៃអាទិត្យ​ថាខ្លួន កំពុងតាម​ស្វែងរក​ជនជាតិ​កូរ៉េខាងជើង០៤នាក់បន្ថែម​ទៀត នៅក្នុងសំណុំ​រឿងលោក គីម ជុងណាំ។ ទន្ទឹមគ្នា​នោះ​ខាងប៉ូលិសម៉ាឡេស៊ី​ជឿជាក់ថា ជនសង្ស័យទំាងនេះ​​ទំនងជាបានត្រឡប់​​ទៅកាន់ទីក្រុង ព្យុងយ៉ាង ​វិញតាំងតែពី​ថ្ងៃទី១៧ ខែកុម្ភៈម្ល៉េះ។

លោក ផាក ជីវ៉ុន បានឱ្យដឹងដូច្នេះថា «បើសិនជាកូរ៉េខាងជើង​មិនមែនជា​អ្នកនៅពីក្រោយ​អំពើឃាតកម្ម​នេះទេ ពួកគេ​គួរតែធ្វើកិច្ច​សហការ​ជាមួយ​រដ្ឋាភិបាល​ម៉ាឡេស៊ី តាមរយៈការ​ធ្វើបត្យាប័ន​ជនសង្ស័យទំាង​បួននាក់ និងធ្វើការស៊ើប​អង្កេត​យ៉ាងទូលំទូលាយ (...) ហើយយើង​សង្ឃឹមថា​រដ្ឋាភិបាលកូរ៉េខាងត្បូង អាចនឹងធ្វើ​កិច្ចសហការ​ជាមួយសមាភាគី​ម៉ាឡេស៊ី សំដៅទម្លាយ​អាថ៌កំបាំង​នៃឃាតកម្មលើ​បងប្រុស​លោក គីម ជុងអ៊ុន»

គួរបញ្ជាក់ថា លោក គីម ជុងណាំ ត្រូវបានគេធ្វើ​ឃាត​នៅឯព្រលានយន្ដ​ហោះអន្តរជាតិ​ទីក្រុងគូឡាឡាំពួរ កាលពី​​ថ្ងៃទី១៣ ខែកុម្ភៈ ឆ្នាំ២០១៧ រីឯកូរ៉េខាងត្បូង និងសហរដ្ឋអាមរិក រួមទំាងម៉ាឡេស៊ី​សុទ្ធតែយល់ថា របបដឹកនាំ​លោក គីម ជុងអ៊ុន អាចជាអ្នក​នៅពីក្រោយ​នៃការសម្លាប់​បងប្រុសម្ដាយទីទៃ​របស់ខ្លួន៕