(ហ្សាការតា)៖ ប្រទេសនីមួយៗនៅលើពិភពលោកយើងនេះ ភាគច្រើនតែងតែមានកន្លែងដែលស្អាតៗ និងគួរឲ្យទាក់ទាញរៀងៗខ្លួន ប៉ុន្តែនាពេលនេះនៅក្នុងចំណោមប្រទេសចំនួន២០ដែលមានទេសភាពស្អាតបំផុតលើលោក ស្កុតឡែនត្រូវបានគេចាត់ទុកថាជាប្រទេសដែលមានសម្រស់ស្រស់ស្អាតជាងគេបង្អស់ ជាមួយនឹងឆ្នេរដ៏ល្អផូរផង់ និងបឹងក៏ដូចជាសមុត្រដ៏ថ្លាឆ្វង់ ព្រមទាំងប្រាសាទបុរាណជាច្រើនគួរឲ្យចង់គយគុនថែមទៀតផង។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាល្ងាចថ្ងៃព្រហស្បតិ៍ ទី១៦ ខែកុម្ភៈ ឆ្នាំ២០១៧។
គួរបញ្ជាក់ថាបញ្ជីសម្រិតសម្រាំងប្រទេសទាំង២០ដែលមានទេសភាពស្អាតជាងគេបំផុតនៅលើពិភពលោកខាងលើនេះ ត្រូវបានធ្វើឡើងដោយគេហទំព័រមគ្គុទេសក៍នៃការធ្វើដំណើរទេសចរណ៍ Rough Guides ដែលមានមូលដ្ឋាននៅក្នុងទីក្រុងឡុងដ៍នៃចក្រភពអង់គ្លេស។ ដោយឡែកលេខរៀងបន្តបន្ទាប់បានទៅលើកាណាដា (លេខពីរ), នូវែលសេឡង់ (លេខបី), អ៊ីតាលី (លេខបួន), និងអាហ្រ្វិកខាងត្បូង (លេខប្រាំ) ខណៈនៅក្នុងប្រទេសចំនួន២០នេះក៏មានប្រទេសអាស៊ីអាគ្នេយ៍ចំនួនពីរផងដែរគឺ ឥណ្ឌូណេស៊ីដែលស្ថិតនៅលេខរៀងទី០៦ និងប្រទេសវៀតណាមដែលជាប់លេខរៀងទី២០ចុងក្រោយគេ៕
