(​ញូដេលី)៖ ក្រុមគ្រូពេទ្យនៅក្នុងប្រទេសឥណ្ឌា កំពុងត្រៀមការវះកាត់សម្រកទម្ងន់ ស្ត្រីជនជាតិអេហ្ស៊ីបម្នាក់​ ដែលមាន​ទម្ងន់ធ្ងន់​ជាងគេនៅលើពិភពលោក ដល់ទៅជាង៥០០គីឡូក្រាម តាមរយៈការតម្រូវឱ្យរូបនាង​បរិភោគរបបអាហាររាវពិសេស មុននឹងទទួលការវះកាត់។ នេះបើតាមការចេញផ្សាយដោយ សារព័ត៌មាន Channel News Asia ​នៅថ្ងៃចន្ទ ទី១៣ ខែកុម្ភៈ ឆ្នាំ២០១៧។

ដោយសារតែមានទម្ងន់ដល់ទៅជាង ៥០០គីឡូក្រាម នាង Eman Ahmed Abd El Aty មានអាយុ៣៧ឆ្នាំ បានសម្ងំនៅតែក្នុងផ្ទះ​មិនអាចចេញទៅណារួច ដូចមនុស្សធម្មតា អស់រយៈពេលជាង២៥ឆ្នាំមកហើយ​ រហូតដល់រូបនាងទើបតែធ្វើដំណើរពីទីក្រុង Alexandria នៃប្រទេសអេហ្ស៊ីប មកដល់ទីក្រុងម៉ុមបៃ (​Mumbai) ប្រទេសឥណ្ឌា កាលពីចុងសប្ដាហ៍កន្លងទៅនេះ ដើម្បីទទួល​ការវះ​កាត់សម្រកទម្ងន់។ ដោយឡែក បើយោងតាមក្រុមគ្រូពេទ្យ សម្រាប់រយៈពេល ២៥ថ្ងៃខាងមុខនេះ នាង Abd El Aty អាចបរិភោគបានត្រឹម តែរបបអាហាររាវពិសេស តែប៉ុណ្ណោះ ដែលអាចនឹងជួយនាងសម្រកទម្ងន់បាន ៥០គីឡូក្រាម តាមការរំពឹងទុក មុននឹងពួកគេចាប់ផ្ដើមការវះកាត់។

គួរបញ្ជាក់ថា ក្រុមគ្រូពេទ្យឥណ្ឌានៃមន្ទីពេទ្យ Mumbai's Saifee សង្ឈឹមថាពួកគេអាចនឹងវះកាត់សម្រកទម្ងន់នាង Abd El Aty យ៉ាងហោចណាស់ពី៩០ ទៅ ១៥០គីឡូក្រាម៕